Ultimatum batok sa uyab ni Ashley Abad gibakwi
CEBU, Philippines – Gibakwi sa kapolisan ang ultimatum nga gihatag batok sa uyab ni Ashley Abad kinsa namatay tungod sa drug overdose.
Apan taliwa niini, giingong magpadayon gihapon ang imbestigasyon sa kaso.
Ang direktor sa Cebu City Police Office (CCPO) Senior Superintendent Royina Garma nagkanayon nga ilaha pang gi-evaluate ang maong kaso kon mamahimo na bang ipa-subpoena ang maong lalaki.
Kahinumduman nga niadtong Lunes gipadayag ni Garma nga kon dili kini moatubang kanila ang maong batan-on aron mohatag og pahayag hangtud mosawop ang adlaw, ipa-summon siya pinaagi sa subpoena power ni Chief PNP Oscar Albayalde.
Wala gyud niatubang ang maong lalaki apan ang iyang abogado maoy nakighinabi kang Garma ug nitataw nga andam sila moatubang sa kasong ipasaka.
Nunot niini, upat ka giingong higala ni Abad ang nakigkita kang Garma aron makig-alayon sa gihimo nilang imbestigasyon kalabutan sa kamatayon ni Abad niadtong Enero 19 atol sa usa ka party.
Kini ang gitug-an ni Atty. Vicente Fernandez II, abogado sa mga higala ni Abad nga nahinabi sa Banat News.
Matud ni Fernandez nga ikatulo nila ka higayon niadtong Lunes sa gabii nga nipaubos sa imbestigasyon atubangan ni Garma ug usa sa mga rason sa ilang pakig-alayon ug pagpatim-aw sa iyang mga kliyente sa kapolisan aron dili kini sila ma-stress lakip ang ilang mga ginikanan human sila gilakip isip mga suspetsado. (Rowena D. Capistrano/BDB)(BANAT NEWS)
- Latest
