Reluya paatrason ni Feliciano sa kandidatura

CEBU, Philippines — Ang kaatbang ni incumbent San Fernando Mayor Lakambini “Neneth” Reluya nga ang magpapatigayon nga si Ruben Feliciano nanawagan nga moatras si Reluya sa kandidatura niini.

Si Feliciano ang nidagan kini isip mayor sa lungsod sa umaabot midterm election sa buwan sa Mayo atbang kang Reluya.

“Reluya withdraw, ako na ang mayor”, awhag ni Feliciano kang Reluya.

Kagahapon si Feliciano nisumitir sa iyang kaugalingon diha sa Cebu Provincial Police Office (CPPO) aron mopaubos sa imbestigasyon ug paglimpiyo sa iyang pangalan.

Kini kalabutan sa nahitabong pagpamanhig sa magtiayong Neneth ug Ricardo Reluya, Jr. ug sa ilang mga kauban.

Si Feliciano nipasangil kang Neneth nga buot mokuha og simpatiya sa katawhan ug boto sa mga lumolupyo sa San Fernando ug ang nahitabo giingong away sa mga drug lord o sa mga Sabalones.

“Kamo, kamo lang diha nag-away mga drug lord, mga Sabalones inyong people, nagpatayan mo dinha, kaya maayo pa withdraw, ako na ang mayor”, matud ni Feliciano.

Si Feliciano nihimakak sa pasangil nga giingong aduna siya’y kalambigitan sa nahitabo sa magtiayong Reluya.

Si Feliciano nipadayag kini sa iyang pahasubo sa pamilyang Reluya ug sa daling pag-recover sa mayor kinsa naangol lakip ang duha ka staff niini sa nahitabong pagpamanhig.

Si Ricardo, drayber nga si Allan Bayot ug tourism officer nga si Ricky Monterona patay sa maong insidente.

Subay niini, upat ka tawo ang gitutokan karon sa kapolisan  nga giingong dunay kalambigitan sa pagpamanhig.

Kini ang gitug-an ni Police Regional Office (PRO)- 7 director Chief Superintendent Debold Sinas.

Matud pa ni Sinas nga aduna sila’y upat ka suspek, apan dili una nila hinganlan hangtud dili nila mahinabi ang pamilyang Reluya. Nichole Alexis A. Abas (BANAT NEWS)