13-anyos gilugos sa papa, mama wa mosumbong
CEBU, Philippines — Magtiayon diha sa usa sa mga barangay ning Dakbayan sa Sugbo gidakop tungod sa pagpanglugos sa amahan ngadto sa ilang 13 anyos nga anak nga babaye nga giingong gipasagdan ra sab sa inahan.
Ang hepe sa Mabolo Police Station nga si Chief Inspector Dindo Alaras nagkanayon nga ang kanhi school advisor sa bata mao ang miduol kanila ug misumbong bahin sa nahitabo sa biktima.
“(Ang maestra) niduol sa atong estasyon para pagtabang sa iyang estudyante nga allegedly kadaghan na gi-rape sa iyang father. So since elementary pa daw,” matod ni Alaras. Ang WCPD (Women and Children Protection Desk) daling gipangita ang mga ginikanan ug dali silang gidakop.
“Base sa information nga atong nakuha gi konsente man sa inahan. Kahibaw ang inahan pero wala niya gi-report. Kun wala ning teacher dili ta makahibalo ani nga pang hitabo kay contained inside sa balay rani bitaw,” dugang ni Alaras.
Ang bata matud pa sa advisor nga nakahinabi sa Banat News mitug-an nga nabantayan niyang pirmeng wala sa kaugalingon ang bata mao nga iya kining gitawag og giestoryahan ug didto niya nahibaw-an ang pagpangabuso.
Ang 51-anyos nga amahan dihang nahinabi sa Banat News kusganong nihimakak niini kay matud niya gabii iyang trabaho ug adlawan na siyang makauli. Matud niya pinangga niya ang biktima kay kinamanghoran niya kini.
“Dili gyud ba tinuod. Ako dili pud ko mogamit og drugas. Nanarbaho gyud ko para nila,” sumala pa sa amahan. Imarie Jane D. Madarieta, USJ-R Intern, IBM, (BANAT NEWS)
- Latest
