Davide ug mga kaubanan, gikiha ni Saavedra

CEBU, Philippines — Gireklamo sa buhatan sa Ombudsman-Visayas si Gobernador Hilario Davide III ug onse ka mga kauban subay sa nahitabong bidding subay sa 20-storey nga Capitol Resource Center.

Ang naila nga whistleblower nga si Crisologo Saavedra, Jr., kinsa nangangkon nga nag-advocate batok kurapsyon nagkanayon nga si Davide, ang mga sakop sa Bids and Awards Committee (BAC), ug ang  Technical Working Group (TWG) mihatag og pabor ngadto sa WT Construction ug gi-award ang P1.3 billion multi-storey building project, bisan paman og kuwang kini sa mga rekisitos.

Matud niya nga ang WT Construction, disqualified nga bidder kay wala kini makaabot sa gi-require nga 50 percent track record sa susamang mga proyekto nga nahuman sulod sa napulo ka tuig dihang miapil kini sa subasta.

Lakip sa gikiha ni Saavedra mao sila si BAC chairman Mark Tolentino ug mga sakop niini nga silang Jone Sepe, Hector Jamora, Danilo Rodas, ug Donato Villa ingon man ang mga sakop sa TWG nga sila si Josefino Roberto, Edgar Carredo, Rey Marinas, Rica Marie Lanojan, ug Chrissie Jane Iman; ug ang private respondent nga WT Inc, Construction president/CEO ug Board of Directors.

Matud usab ni Saavedra nga ang WT Construction gi-blacklist na unta sa BAC human kini mikolekta og P257.4 million sa Cebu Province sa gitrabaho niini nga ground development sa controversial nga Cebu International Convention Center (CICC).

Subay niini, mihangyo si Saavedra sa Ombudsman nga pa-imbestigahan ang maong anomalya ug kasohan si Davide ug mga kauban ingon man pagdeklara nga pakyas ang nahitabo nga bidding. Ipa-deklara sab niini ang WT Construction nga wala motuman nga bidder ug i-blacklisted aron dili na makaapil sa umaabot nga proyekto sa Kapitolyo.

Buot usabniya nga masuspenso si Davide ug mga kauban samtang giimbestigar ang kaso. (BANAT NEWS)