Uyab sa na-overdose, kaubanan makonsiderar nga suspek-Sinas

CEBU, Philippines — Mibahad ang kapolisan nga kun dili mokooperar ang uyab sa 19 anyos nga dalagang gikatahong na-overdose sa usa ka matang sa party drugs hayan himuon kining numero unong suspek sa kamatayon dalaga.

“We will treat him as a suspect later on kung ayaw niya mag cooperate, hulata gyud niya nga makuha namo ang affidavit sa ubang witness at siya gyud ang himuon namong number one suspect,” bahad kini sa direktor sa Police Regional Office-7 nga si Chief Superintendent Debold Sinas.

“There’s already a report that he is the one kauban atong biktima bago namatay and we received reports that he knows about that ecstasy thing,” dugang sa maong heneral.

Giimbitar na sa kapolisan ang maong lalaki human nga gitumbok kini nga usa sa persons of interest apan wala kini misanong. “Basta ang estorya is if he will not cooperate it’s up to him kay kung wala siyay gitago ngano mang di siya mo-cooperate?,” Butyag ni Sinas nga lakip sab sa mga persons of interest mao ang mga higala nga kauban sa dalaga atol sa maong concert, ug silang tanan wala usab mo-kooperar.

“The mere fact that they were there at nagtago na sila and wala sila nag-cooperate sa police that is another story,” matud ni Sinas. Sigun ni Sinas nga misugot na ang pamilya sa biktima nga si Ashley Abad nga ipa-autopsy ang patay’ng lawas niini aron matumbok kun unsa nga drugas ang naka-overdose niini. Sa unang mga reports, si Abad giingong nag-collapse atol sa usa ka concert didto sa Cebu Business Park niadtong Enero 19. Base sa pasiunang pakisusi sa doktor sa biktima, giingong ‘overdose of a certain drug’ ra  ang findings niini. Hinungdan nga misugyot ang kapolisan nga ipaubos si Abad og autopsy didto sa PNP Crime Laboratory inabagan sa chemist sa Philippine Drug Enforcement Agency-7 aron matumbok gyud kun unsa nga drugas ang nakapatay niini.

Kagahapon gihatod na sa kataposang pahuwayan si Abad didto sa Angelicum Garden of Angels, sa Dakbayan sa Mandaue. Hangtud sa katapusan pabiling wala mohatag og pamahayag sa media ang pamilyang Abad. (BANAT NEWS)