Opisyales sa mga barangay sa San Fernando nakig-dialogue

CEBU, Philippines — Opisyales sa mga barangay sa Lungsod sa San Fernando nakig-dialogue sa Police Regional Office-7 human naalarma sa sunod-sunod nga patay sa ilang lugar ug sa mga nikatap nga mensahe diha sa social media nga giingong gitagna ang mga sunod mamatay nga opisyal.

Kapin sa 18 ka opisyal ug representate sa mga barangay sa lungsod pinangulohan ni Kongresista Gerald Anthony “Samsam” Gullas, Jr. sa unang distrito sa Probinsiya sa Sugbo ang nibisita kagahapon diha sa PRO-7.

Ang direktor sa PRO-7 Senior Superintendent Debold Sinas nibutyag nga iyang gisaaran ang maong mga opisyal nga magpakatap og dugang polis sa matag barangay aron mapugngan ang krimen. Samtang si Gullas nipadayag nga nisalig sila sa gihimong lakang sa kapolisan.

"Nalipay mi sa gihatag nga suporta sa PNP. We put our faith and our trust to our PNP and most especially kay RD (Regional Director Sinas) and chief PNP (Albayalde) to solve the Reluya case”, matud ni Gullas.

Si Filomeno Leyson, purok federation president sa tibuok San Fernando nibutyag nga aduna sila’y napalgan sa social media nga mga fake account diin gitagna kinsa ang sunod nga mamatay.

Dugang ni Leyson nga silang tanang opisyal nikondenar sa mga nahitabong pagpatay sa mga opisyal sa ilang lugar.

Nasayran nga sa buwan sa Enero karong tuiga sunod-sunod ang mga insidente sa patay sa lungsod.

Gisugdan kini dihang gipusil patay ang Konsehal sa lungsod nga si Reneboy Dacalos niadtong Enero 10.

Human nakalabay ang unom adlaw gibanhigan patay usab si Johnny Arriesgado, barangay kapitan sa Barangay Magsico.

Ug pagka Enero 22 ang papgamanhig sa magtiayong Lakambini ug Ricado Reluya uban sa ilang, drayber, staff ug bodyguard.

Nunot niini, si Gullas niawhag sa katawhan sa lungsod nga mosalig lang sa kapolisan tungod kay sayod siya nga nihimo usab kini sa ilang trabaho.

Giawhag usab ni Gullas ang katawhan nga padayong magmabinantayon ug dili magduha-duha sa pagtaho kong aduna sila’y mabantayan nga kadudahan sa ilang palibot. (Rowena D. Capistrano/BDB)(BANATNEWS)