Oponganon makapahimulos sa libreng sakay

CEBU, Philippines – Sulod sa usa ka semana makapahimulos ang mga Oponganon sa libreng sakay sa E-jeepneys atol unya sa paglusad sa maong solar-powered jeepneys sunod buwan.

Gipahibawo sa chairman sa United Drivers Operators Transport Cooperative (UDOTCO), Malvin Arias, nga sa Pebrero 8 niining tuiga ilusad ang E-jeepney timaan nga sugdan na kini sa pagpamasahero.

Kabahin kini sa PUV modernization program sa Department of Transportation (DOTr).

Gikan sa Pebrero 8 hangtud 14 mohatag og libre nga sakay sa mga pasahero nga molibot sa rota sa Mactan circumferential highway ug laing rota paingon sa Lungsod sa Cordova.

Matud ni Arias nga adunay 25 ka units sa E-jeepney ang magdagan ug laing 25 ang idugang karong buwan sa Marso.

Gitinguha nga sa buwan sa Abril makompleto ang 100 ka E-jeepneys.

Kadto lang mga drayber nga miyembro sa UDOTCO ug mopaubos sa Driver’s Academy Seminar sa Land Transportation Franchising and Regulatory Board (LTFRB) nga ipahigayon sa Enero 29 ang hatagan og prebilihiyo nga maka-operate sa E-jeep.

Ang drayber ug konduktor sa E-jeep magdawatan og suholan sa kooperatiba sa ilang walo ka oras nga pagpamasada.

Gibutyag ni Arias nga ang mga drayber bahinon ngadto sa duha ka shifting diin adunay magsugod sa alas 4:00 sa kadlawon ngadto sa ala 1:00 sa hapon ug adunay alas 2:00 sa hapon hangtud sa alas 11:00 sa gabii.

Samtang si Mayor Paz Radaza sa iyang naunang pamahayag nipasabot nga ang maong mga E-jeepney dili tumong niini nga kuhaan sa panginabuhian ang mga drayber sa traysikol.

Ang mga traysikol makapadayon kini sa ilang pagpamasahero sa barangay o interior roads.

Ang karaang PUJ terminal sa Barangay Pajo magsilbing holding bay sa mga E-jeepney nga adunay minimum nga pletehan base sa gipatuman sa LTFRB.

Si Johnny Barolas, usa ka drayber sa traysikol nga nagbiyahian sa Sitio Sangi, Pajo – Poblacion nipadayag nga wala siya mabalaka sanglit makapadayon sila sa pagpamasahero sukwahi sa nanggawas nga taho nga i-phase out ang mga traysikol. (Romeo T. Limpangog/BDB)

Operasyon sa Beeps malampuson–Ouano

Human sa kapin sa usa ka buwan nga pag-operate ang Cebu City Transportation Office(CCTO) nipadayag nga malampuson ang Beeps nga usa ka Public Utility Vehicles (PUVs) nga naka-operate sa Siyudad sa Sugbo.

Sa 40 ka units nga available ang operations chief sa CCTO Francisco Ouano nagkanayon nga 20 lang niini ang nagdagan sa kadalanan sa siyudad nga maka-cater og mga pasahero nga sobra pa sa 60 ka Public Utility Jeepneys (PUJs).

Matud ni Ouano nga gisultihan na niya ang Persano Corporation ang tag-iya sa Beeps units nga mohimo og aksiyon sa isyu sa loading ug unloading sa pipila ka units.

Giingong ang management sa Persano Corporation niuyon nga mobutang og bus stop signs sa mga designated bus stops sa mga unit.

Ang route 1 gikan sa Cebu City Hall paingon sa Asia Town IT Park via Robinsons Galleria Cebu-Cebu Business Park ug vice versa.

Ang route 2 gikan sa R. Duterte Street-Sykes via Happy Valley-Fuente Osmeña-Ramos Street-D. Jakosalem Street-Cebu Business Park ug vice versa.

Malaumon si Ouano nga ang bus stop signs mainstolar sulod niining buwana aron masiguro nga dili maapektohan ang  dagan sa trapiko sa kadalanan.

Ang plete sa Beeps naa sa P8 ngadto sa P10 depende sa destinasyon.

Gawas niini, ang CCTO nakig-alayon na usab sa management sa Persano Corporation alang sa posibleng dugang rota sa Beeps units.

Matud usab ni Ouano nga ang kompaniya nipasalig nga mangita og rota nga dili makaapekto sa panginabuhian sa mga drayber sa public utility jeepney.

Niadtong Disyembre 22, 2018 dihang ang Beeps unang nagdagan sa kadalanan sa siyudad. (/BDB)(BANAT NEWS)