Pagpaubos sa “age of criminal responsibility” gisupak

CEBU, Philippines – Gipaagi og lihok-protesta sa mga nagkalain-laing grupo Sugbo ang ilang pagsupak sa nahimong desisyon sa House Committee on Justice nga paubsan ang edad sa batan-on nga makahimo og krimen diin aduna na kini tulubagon, gikan sa 15-anyos gihimo kining 9-anyos.

Dili momenus 300 ka miyembro sa Akbayan, Partido ng Manggawa, Sanlakas, Children’s Legal Bureau (CLB), Pagtambayayong Foundation Incorporated, Bidlisiw, Cebu Action Group ug uban pa ang mitambong sa maong rally.

Samtang sila nagmartsa kagahapon sa buntag gikan sa Fuente Osmeña Circle paingon sa Kapitolyo, ilang singgit mao: “Ang bata panggaon dili bilangguon”

Si Atty. Noemi Abarientos, tigpamaba sa CLB nagkanayon nga dili makatarunganon ang gihimo karon sa Kongreso nga gidali-dali ang pagpaubos sa minimum age of criminal responsibility.

Matud niya nga wala silay nakita nga rason nganong iubos ang minimum age of criminal responsibility.

“So, it is not the fault of the children kong mogawas sila nga badlungon kay in the first place those who are responsible for making good citizen are not doing their job from the family perhaps up to the society,” matud ni Abarientos.

Si Maryjun Delgado, psychologist ug professor nagkanayon nga ang nagpangidaron og 12-anyos paubos, wala pay buot, dali ra suguon, ilaron, pabuhaton og butang kay di pa man sila kahibaw unsay sakto o dili.

Nagplano usab ang grupo ni Abarientos nga modangop sa mga simbahan ug magpakitabang kay kahibaw sila nga ang simbahan nag-amuma sa mga kabataan.

Subay niini, ang pangulo sa Cebu City Social Welfare and Services Flora Bartolome mipadayag nga dili siya pabor sa maong desisyon sa kongreso.

“Nipirma gani mi sa petisyon ana nga “no” mi ana, bata pa gani, daghan kaayo mapriso, lisod baya kaayo, asa man ibutang?” ni Bartolome pa.

Gibutyag niini nga kuwang gyud og pasilidad ang siyudad aron mo-accommodate ang mga bata nga posibleng manubag sa krimen kon hingpit nga maamendar ang Child Welfare Act.

Dugang niya nga usa sa makatabang aron maiway sa bati nga binuhatan ang kabataan mao ang mga ginikanan nga adunay pagpakanaba sa ilang mga anak. (Joevelon G. Pinay /DILT)(BANAT NEWS)