Text nga nag-ingong apil si Osmeña sa lista subayon

CEBU, Philippines – Wala gihimakak ug wala sab gikompirmar ni Chief Supt. Debold Sinas, direktor sa PRO-7 nga naapil si Cebu City Mayor Tomas Osmeña sa bag-ong drug watchlist sa administrasyong Duterte apan matud niya nga ilang subayon ang maong taho.

“I do not know and sorry I couldn’t comment because I have no idea. We will check on this report,” si Sinas miingon sa Banat News.

Hinuon, giingong andam sila nga moabag sa mayor kun magpatabang kini kanila sa pag-trace sa tinubdan sa maong mensahe aron mapasakahan kini og kasong libel.

“Of course, we will accommodate the request for assistance by the city mayor,” sigun sa maong heneral.

Usa ka mensahe sa text ang mikatap karon diin nagingong nalangkob na sa bag-ong drug watch list si Osmeña. Gisuwayan sa Banat News sa pagkuha sa habig ni Osmeña pinaagi sa text message apan wala kini mitubag.

Gitinguha usab sa Banat News nga makuhaan og habig ang regional direktor sa National Police Commission (NAPOLCOM) Region 7 nga si Dir. Homer Mariano Cabaral apan dili kini makontak.

Kahinumduman nga miboto ang kontrobersiya kabahin sa maong mayor niadtong Marso 2018 dihang gipasanginlan siya ni Justice Secretary Vitaliano Aguirre II nga tigdawatan og payola sa mga drug lord.

Nagbase si Aguirre sa affidavit sa igagaw niJeffrey ‘Jaguar’ Diaz nga si Reynaldo “Jumbo” Diaz Nobyimbre 23, 2016, diin nagingong nakadawat si Osmeña og P2 million niadtong 2013 ug P5 million niadtong 2016 gikan ni Jeffrey kinsang gikatahong drug lord sa Central Visayas.

Depensa kaniadto ni Osmeña nga gisuwayan siya og suhol ni Diaz apan iya kining gibalibaran.

Pagkasunod buwan niana, miluwat si Aaron Aquino, director general sa Philippine Drug Enforcement Agency og pamahayag diin nagingong wala naapil si Osmeña sa listahan ni Duterte sa mga narco-politician sa nasud. (/IBM)(BANAT NEWS)