Mas menus ang basurang nakolekta

CEBU, Philippines — Mas gamay ang  nakolektang basura karong tuiga kun itandi sa nakalabay nga Sinulog 2018 sumala pa sa  officer-in-charge sa Department of Public Services (DPS) John Paul Gelasque.

Matud niya niabot sa 210 tonelada nga basura ang ilang nakolekta atol sa Sinulog Grand Parade niadtong adlaw’ng Domingo apan menus kini karon kay sa miaging tuig miabot kini og 220 ka tonelada.

Usa sa nakita ni Gelasque nga nakatampo nganong nigamay ang nakolekta gumikan sa eco-stations nga gibutang sa Cebu City Environment and Natural Resources Office (CCENRO) sa nagkalain-laing lugar sa siyudad.

Midugang sab kini nga ang mga Barangay Environmental Officer (BEOs) nga gipakatap sab ug dako og natampo sa paghipos sa basura subay na sa kalihukan sa Sinulog.

Nasayran nga nakasugod og limpyo ang DPS alas 8 na sa gabii ug naka-full blast sila alas 9 sa gabii tungod kay naglisod sila og sulod sa mga dalan tungod sa mga street parties mao nga naabtan pagpanglimpyo alas 6 na sa Lunes sa buntag.

Ang mga dapit nga nakita sa DPS nga daghang basura diha habig sa Sto. Niño, Cathedral, Plaza Independencia ug City Hall grounds.

Nasuta ang DPS dunay 546 ka mga tawo nga gipakatap apan tungod kay nakig-alayon sila sa mga loaders ug drivers sa barangay miabot sa kapin 800 ka mga tawo ang gi-deploy.

Gitutukan sa DPS ang diha sa Sto. Niño area, Lapu-Lapu ug Legaspi Streets gumikan sa kabaga sa mga tawo.

Matud niya dili nila igsapayan kun may ihatag o walay insentibo gikan sa siyudad kondili giisip nalang nila kini nga panaad ngadto sa Senyor Sto.Niño sanglit mao man kini ilang trabaho.

Sagad sa nakuha sa DPS nga mga basura mga plastic nga botelya sa tubig ug uban pa. (BANAT NEWS)