Danao Hospital makaopera na sa mata

CEBU, Philippines — Aduna nay bag-ong pasilidad ang tambalanan sa probinsya  sa Sugbo didto sa Dakbayan sa Danao.

Ang kapitolyo pinaagi sa Provincial Health Office (PHO) pormal nga giablihan ang bag-ong cataract care unit (CCU) ug ophthalmology operating room sa Cebu Provincial Hospital –Danao.

Nagpasabot kini nga ang mga adunay sakit sa mata didto sa amihanan dili na kinahanglan pa mobiyahe padulong sa syuddad sa Sugbo aron magpatambal.

Matud ni Dr. Rene Catan ang pangulo sa PHO nga dili pa “ideal” ang mga provincial hospitals sa probinsya sa Sugbo, sanglit padayon pa man usab ang ilang pagpalambo niini, apan gikatandi ni Catan nga dako na ang nahimong kalamboan sa mga hospital sa probinsya karon kun itandi sa niaging katuigan.

Ang probinsya sa Sugbo nigasto og dili momenus P1.5 milyones alang sa pagpalit og nagkadaiyang ekipo sama na lang sa slit lamp, head lamp, keratometer, biometric machines, operating microscope sa matag operating room.

Matud ni Catan gikatakda usab nila nga buksan ang laing cataract operating facility sa CPH-Bogo.

Si Dr. Prudencio Manubag ang pangulo sa CPH-Danao nagkanayon nga ilang tinguha nga ma cataract-free na ang Sugbo.

Matud niya nga mataga operasyon sa mata, dili momenus sa P50 mil ngadto sa P100 mil ang magasto kun adto adto sa mga pribado nga tambalanan. Apan kon adto sa CPH-Danao, libre ra kini.

Sa pagkakaron moabot na sa 50 ka mga senior citizen sa amihanan ang nagpa screen sa ilanhg mata ug nanginahyanglan og operasyon. (BANAT NEWS)