EMB moisyu og CDO batok sa factory
CEBU, Philippines — Ang Environmental Management Bureau (EMB)-7 moisyu og cease and desist order batok sa kompaniya nga nipagawas og hugaw nga kolor puwa nga tubig gikan sa ilang buhatan padulong sa kadagatan sa Barangay Dumlog, Dakbayan sa Talisay.
Usa ka netizen ang ni-post diha sa facebook sa nakuha niyang video nga nag-viral kabahin sa hugaw nga tubig nga nigawas gikan sa tubo deretso ngadto sa dagat.
Ang maong establisamento nag-manufacture og mga corrugated pads, wooden pallets ug material handling equipment nga naglakip sa hand pallet truck ug rental sa electric kettle.
Base sa imbestigasyon sa EMB ang wastewater nakuha gikan sa inking ug labelling area.
Ang kompaniya giingong walay drainage system hinungdan adto nila ipagawas sa kadagatan ang pundo nga tubig.
Ang kolor pula nga tubig kontaminado kini diin aduna kini sagol nga organic pigments, acrylic resins, ug alcohol.
Ang maong hugaw gikonsiderar nga hazardous waste ug kalapasan sa Akta Republika 6969 kun “Toxic Substances and Hazardous and Nuclear Wastes Control Act of 1990”.
Ang hazardous waste storage area sa kompaniya walay containment ug proper roofing hinungdan nga panahon sa ulan dali ra madala ug nasuta usab sa EMB nga ang planta walay wastewater treatment facility nga usa ka kalapasan sa “Philippine Clean Water Act” ug nasuta usab ang abog nagtuyok sa production equipment.
“Therefore, the facility has violated environmental laws such as the Philippine Clean Air Act, The Philippine Clean Water Act, and Toxic Substances and Hazardous and Nuclear Wastes Control Act of 1990.”
Base sa record sa EMB-7 ang establisamento nag-operate nga walay valid discharge permit, permit to operate, and hazardous waste generator registration.
Ang EMB nagkanayon nga tungod sa prima facie evidence ang buhatan moisyu og CDO ug iduso nila ang maong kaso ngadto sa Pollution Adjudication Board (PAB).
Ang maong establisamento gikatakdang ipatawag alang sa technical conference kabahin sa nahisgutan nga kalapasan. BDB, (BANATNEWS)
- Latest
