Paghatag og ID sa manindahay nalangan

CEBU, Philippines — Nakasinati og gamay’ng problema ang Division for the Welfare of the Urban Poor (DWUP) sa ilang pag-release og ID kagahapon ngadto sa mga manindahay nga nakaparehistro diha sa ilang buhatan aron mamaligya sugod kagahapon hangtud sa adlaw nga Domingo atol sa kalihukan sa Sinulog 2019.

Matud sa operation’s chief sa DWUP Genevieve Alcoseba nga ang ilang registration han-ay kaayo apan ang releasing nagkaguliyang ug ilang gipaningkamutan nga mahan-ay kini.

Nagsugod ang releasing sa ID kagahapon alas 8:00 sa buntag apan gumikan sa kasamok ilabi na sa habig sa mga manindahay temporaryo kining gihunong ug nibalik sila sa paghatag og ID alas 3:00 na sa hapon kagahapon.

Usa usab sa giingong nakatampo nga wala mahan-ay ang releasing ang kagamay sa lugar sanglit diha lang sa DWUP office nahitabo ang paghatag og ID ug naghuot ang mga manindahay.

“Ato silang gipasabot pananglitan wala sila’y ID kay ang usa nahitabo kay na-misprint ang ID kay ang nabutang nga vendors kaning sports center, vendors sports center so meaning kaning 3 mil kung amo to i-release ang ID mosulod silang tanan sa sports center so mao to nga gi-work sa in-charge sa mga ID nga nag-printing gyud og bag-o”, butyag ni Alcoseba.

Niadtong Miyerkules unta i-release ang mga ID apan gumikan sa maong problema hinungdan nga  nalangay kini.

Karong adlawa sugod sa alas 8:00 sa buntag hangtud sa alas 12 sa udto magpadayon ang DWUP sa pag-release og ID.

“Actually original plan nato is pag-permit ta nila pa-OR na sila daan ang atong problema ato mahadlok ta maka-misplace sa OR so sila gyud ang mogunit sa kwarta, pag-actual deretso gyud ta to ang release”, dugang ni Alcoseba.

Nasayran nga kadtong mga manindahay nga naa nahimutang sa rota sa Sinulog grand parade ug solemn procession tugotan lang makatinda kon moagi na ang prosesyon aron dili makabalda. (/BDB)(BANATNEWS)