Dugang seguridad andam na

CEBU, Philippines – Ang kapolisan ug mga force multipliers sa siyudad andam na alang sa Walk with Mary ug sa Traslacion karong adlawa matud pa ni Police Chief Inspector Wilbert Parilla, hepe sa Cebu City Police Office operations branch.

Laing gibutyag sa hepe nga giusa na nila ang tanang ngalan sa mga notadong kawatan ug mangunguot sa dakbayan ug gipakatap na kini sa tanang estasyonan aron sila mamonitor. Kini ang rason nganong wala giapil sa deployment sa Sinulog ang kapolisan sa mga estasyonan aron ilang matutukan ang mga badlungon sa katilingban.

“Gipangandaman nato ang possible threat sa bombing and kanang mga mo-take advantage nga mga manulis or manguot,” dugang niini.

Gibutyag ni Parilla nga duha ka oras usa pa magsugod ang Walk with Mary, magsugod na ang deployment sa kapolisan ug force multipliers. Lakip nga i-deploy ang mga K9 units.

Sa maong kalihukan, magsugod ang ipatumang seguridad sa simbahan sa Our Lady of Guadalupe paingon sa Basilica Minore del Santo Niño, samtang alang sa Traslacion kutob ra sila sa boundary sa Brgy. Subangdaku, Dakbayan sa Mandaue kay saw-on naman kini sa Mandaue City Police.

Nunot niini nakapahimos ang gatusan ka mga Oponganong deboto sa libreng sakay sa mga manimbahay kagahapon sa basilica diin ang kagamhanan sa Dakbayan sa Lapu-Lapu maoy sponsor.

Mopadagan sab og mga bus ang kagamhanan sa Dakbayan sa Mandaue karong umaabot Domingo aron maoy mohakot sa mga deboto nga matanggong sa Siyudad sa Sugbo human makigsaulog sa kapistahan sa Balaang Bata.

Subay sab sa maong mga kalihukan, ang Visayan Electric Company (VECO) namahayag nga aduna na silay giandam nga mga plano kon ugaling adunay mahitabong pagkapalong sa suplay sa kuryente.

Aduna silay ipang-deploy nga emergency crews sa mga rota nga agian sa foot procession ug grand parade aron matubag dayon ang problema sa kuryente.

Gipahimangnuan sab sa VECO ang ilang mga konsumidor nga pagngon ang mga suga ug appliances sa dili pa mobiya sa ilang mga panimalay aron makigsaulog sa kapistahan. (Romeo T. Limpangog/DILT)(BANAT NEWS)