Devotee City andam nang modawat og deboto
CEBU, Philippines – Giandam na sa kagamhanan sa Siyudad sa Sugbo ang Devotee City nga nahimo nang kabahin panahon sa Sinulog Festival aron mahimong temporaryo nga kapasilungan sa mga deboto ni Sr. Sto. Niño gikan sa nagkalain-laing lugar sa lalawigan.
Matud ni Janice Redulla, executive assistant sa City Hall nga 58 ka container vans ang ilang gibutang sa Devotee City nga gipahiluna sa may Compania Maritima.
Sama sa naandan sa pagmontar nila sa maong temporaryong pasilidad, nakig-alayon sila sa kagamhanan sa Lalawigan sa Sugbo.
Nasayran nga ang probinsiya moapil gyud sa actual operation, sa registration diin ang mohupot niini mao ang Department of Manpower Development and Placement (DMDP) ug ang House Parents mao ang taga probinsiya mismo. Dili momenus usa ka gatus ka empleyado sa Kapitolyo ang miandam sa Devotee City.
Sa miaging tuig miabot sa kapin tres mil ang nagparehistro ug gipanglantawan nga karong tuiga, ingon niini gihapon kadaghan ang modagsa sa Devotee City.
Aron ma-accommodate gyud ang tanan, ang siyudad nagbutang sab og tent kon dili na maigo sa mga container vans.
Gawas sa mga residente sa siyudad ug probinsiya, aduna say taga laing lugar sama sa Dumaguete ug Bohol ang moanhi sa Sugbo ug mopundo sa Devotee City.
Wala hinuoy problema sa seguridad sa dapit sanglit aduna may nagbantay nga mga polis ug force multipliers gikan sa Kapitolyo. (/DILT)(BANAT NEWS)
- Latest
