Pag-share sa impormasyon sa signal shut off ipahunong

CEBU, Philippines — Ang Sinulog Foundation ug kagamhanan sa Siyudad sa Sugbo walay kalibutan sa nigawas nga notice kalabot sa oras ug adlaw sa pagpatuman sa signal shut off apan nag-viral na kini sa facebook.

Kini ang gibutyag ni Konsehal Dave Tumulak, Sinulog executive committee chairman.

 “Kanang nanggawas diha sa social media kita maoy nakuyawan ana gumikan kay simbako uroy ang mga dautang tawo masayod sa oras ug sa adlaw dako ning risgo sa atoang siyudad, dili gyud unta angayan ipagawas ang oras ug adlaw”, matud ni Tumulak.

Si Tumulak nagkanayon nga nakasabot siya sa habig sa mga nang-share niadtong notisya nga buot sila nga masayod sa signal shut off apan angayan usab ikonsiderar ang epekto niini.

Si Tumulak nihangyo nga ihunong ang pag-share sa maong impormasyon alang sa seguridad.

 Nunot niini, ang NTC-7 nipagawas na og oras sa pagpalong nila sa signal sa mga Telcos.

 Si Engineer Bill Peralta sa NTC-7 nagkanayon nga atol sa fluvial procession apektado ang signal sa Mandaue City, Lapu-lapu City ug pipila ka bahin sa Dakbayan sa Sugbo.

Samtang atol sa solemn foot procession ug sa Sinulog grand parade apektado sa signal shut down ang uptown ug downtown area.

 Adunay pipila ka bahin sa Probinsiya sa Bohol nga nag-atubang sa cell site sa Dakbayan sa Sugbo ang makasinati og hinay nga signal.

 Giawhag ni Peralta ang katawhan nga magtinabangay ug motaho sa kanila kong adunay mga wala gitugot nga lugar nga walay signal apan wala motuman ang mga Telcos aron ilaha kining mahatagan og aksiyon. Joevelon G. Pinay, USJ-R Intern, BDB, (BANAT NEWS)