Mananagat apektado sa nanglutaw nga hospital waste

CEBU, Philippines — Nakahatag og dautang epekto sa panginabuhi sa mga mananagat sa syudad sa Mandaue ug Lapu-Lapu City ang nakit-ang mga nanglutaw nga mga ‘hospital waste’ didto sa Mactan channel.

Nunot niini ang buhatan sa kagamhanan sa Dakbayan sa Lapu-Lapu kasamtangan karon nga nanguha sa mga pangalan sa mga lumulupyo sa maong lugar nga nanginabuhi sa pagpanagat alang sa giplano nga pagpanghatag og pinansiyal nga hinabang.

Si Rolando  Bentulan, 57  anyos nga taga Barangay  Buaya miingon nga matag adlaw nga Sabado, miingon nga kung dili siya mamasahero isip traysikol drayber, magkalingaw siya og pagpanginhas sa baybayon, apan wala na nila kini buhata tungod sa taho nga adunay mga hugaw gikan sa mga dagkong ospital sa Sugbu nga gilabay ug naanod sa mga kabaybayonan diha sa maong syudad.

Dugang pa niya nga dihang mitumaw ang taho labot sa nakaplagan nga basura gikan sa tambalanan nga naglakip sa hospital waste nga gigamit diin ang uban adunay HIV, wala na sila mitunob sa baybayon sa kahadlok nga mataptan og sakit.

Ang Mandaue City Environment and Natural Resources Office (CENRO)  miluwat na og kamandoan ngadto sa Davao City Environmental Care Inc., (DCECI) alang sa pagpatuman sa pagpahunong sa operasyon.

Nakita sa CENRO ang  “five counts of environmental laws violations” sa ilang pagkolekta sa mga  hospital wastes gikan sa pipila ka mga pribadong tambalanan sa Dakbayan sa Mandaue ug ingon man pagkadiskubre nga pagpanglutaw niini sa kadagatan sa  Mactan Island.

Ang DCECI maoy gikontrata sa pipila ka mga pribadong tambalanan sa dakbayan sa Mandaue sa pagkolekta ug paghakot sa ilang mga basura alang na sa hingpit nga paglabay  niini.

Ang ‘Cease and Desist Order’ (CDO) nga giluwatan sa Mandaue Cenro ang makahatag  og epekto sa tanan nga operasyon sa DCECI’s nga naglakip sa pagkarga ug paghakot  sa mga basura ug ingon man ang treatment sa maong matang nga mga basura.

Gitataw ni CENRO officer-in-charge Araceli Barlam  nga gamay lamang ang ikapahamtang nga silot batok sa maong kompaniya basehan lamang ang gipatuman nga ordinansa sa dakbayan nga maoy hinungdan nga ilang gibase ang nahimong kalapasan sa Republic Act 9003 o Ecological Solid Waste Management Act,”  nga gipatuman karon sa nasudnong kagamhanan.  LPM, (BANAT NEWS)