Motorista napasok sa prime mover
CEBU, Philippines — Napasok uban sa iyang giluwanan nga motorsiklo sa ilawom sa prime mover ang usa ka motorista dihang sila nagsungag sa may eskina sa dalan Zuelleg, Brgy. Subangdaku sa Dakbayan sa Mandaue pasado alas 11 sa miaging gabii.
Si PO1 Ryan Bintoy sa traffic division sa Mandaue City Police Office miila sa namatay nga si Michael Agosto Arpon, 31-anyos, taga Saac 2, Brgy. Mactan, Lapu-Lapu City. Samtang gimaneho usab ni Heartwin Abedlidas, 28-anyos, taga Lower Malibu, Brgy. Subangdaku, Mandaue City ang prime mover.
Matud pa ni PO1 Bintoy nga gikan sa Siyudad sa Sugbo si Arpon kinsa ilang gituohan nga padulong na kining mopauli sa ilang panimalay, samtang ang prime mover nagdagan usab paingon sa pier area ug dihang naabot sa dapit nahitabuan, nagkasungag ang duha.
Dugang sa polis nga milungtad og pipila ka mga gutlo ang pagkapasok sa biktima ug dihang nakuha na kini, dali kining gihatod sa Mandaue City Hospital apan gideklarar kini sa mga doktor nga dead on arrival.
Si PO1 Bintoy miingon nga kasamtangan nila karong gipriso si Abelidas samtang gipaabot pa ang mga kabanay sa namatay nga mohimo og legal nga lakang. (BANAT NEWS)
- Latest
