Salimbangon mihimakak
CEBU, Philippines — Sa pikas bahin, kusganong gihimakak ni Kongresista Benhur Salimbangon (Cebu Fourth District) ang pangangkon sa usa ka dinakpan tungod sa paglapas sa election gun ban nga siya security aide o escort niini.
"Dili gyud na siya nako security aide. Bisan kausa, not even once wala gyud na nako siya nahimong security aide," matud pa ni Salimbangon nga nanawag sa Banat News gikan sa Hong Kong. Ang gidakop sa kapulisan giila nga si Richard Lepar Monsanto nga taga Barangay Curva sa Lungsod sa Daanbantayan. Nasikop si Monsanto sa checkpoint nga gipahigayon sa kapulisan sa maong dapit pag alas 12:30 sa kaadlawon Enero 13, 2019. Nakuhaan siya og .45 caliber pistol.
Matud pa ni Salimbangon nga alas 8:00 sa gabii sa Enero 12, 2019 nilakaw na siya gikan sa Daanbantayan human sa kasal sa iyang pag-umangkon uban sa uban pang mga pulitiko sama ni kanhi Presidente ug karon House Speaker Gloria Macapagal Arroyo, kanhi Senador Ferdinand “Bongbong” Marcos ug uban pa.
"Kaning tawhana iyaha lang nang gi name dropped akong pangalan aron dili siya madakpan. Pero ang tinud-anay ani dili na nako siya security escort," matud pa ni Salimbangon.
Sa pikas bahin, nadakpan sa kapolisan sa Dakbayan sa Danao ang gipasanginlang tighimo og paltik nga mga armas diha sa Purok 8, Barangay Masaba sa maong dakbayan niadtong Domingo sa udto.
Ang dinakpan giila nga si Julieto Batucan, 48, nagpuyo sa maong dapit Nasakmit gikan kang Batucan ang pipila ka mga human na nga armas sa sub machine pistol .9mm ug cal. 45 pistol lakip usab ang mga kagamitan sa paghimo sa armas ug makina. (BANAT NEWS)
- Latest
