Engkwentro sa Negros Oriental

CEBU, Philippines — Miresulta sa binakbakay ang pag-ambush sa gituohang mga sakop sa rebeldeng New People's Army sa mga sakop sa Philippine Army nga nagsakay og military truck diha sa Barangay Banwague, Guihulngan City, Negros Oriental kagahapon sa buntag.

Matud pa sa acting Public Information Officer sa Armed Forces of the Philippines-Central Command (AFP-CENTCOM) nga si Major Abel Potutan nga ang duha ka section sa 94th Infantry Battalion nagsakay sa ilang 6x6 truck paingon unta sa condemnation rally sa Barangay Linantuyan sa maong dakbayan ug molahos sa  paglubong sa nakalas nga usa ka Citizen Armed Force Geographical Unit (CAFGU) sa mao gihapong barangay.

Apan pag-abot nila sa Sitio Kapudlasan  alas 8:30 sa buntag gipaulanan sila og bala sa mga gituohang mga sakop sa NPA sa maong lugar. Swerteng walay naigo sa mga sundalo ug daling nakabawos.

Milanat pa og 20- minutos ang binakbakay ayha pa misibog ang mga rebelde sa wala matinong direksyon.

Si Potutan miingon sa Banat News nga wala pa masayri kun adunay nasamdan o nakalas sa habig sa mga rebelde.

"Bale ang report nila, sila ang giunahan og pabuto while paadto sila sa barangay Linantuyan gipabuthan sila sa NPA. Sigun sa ilang estorya fully-armed ang ilang nakaengkwentro," sigun sa maong tigpamaba. Nagtuo ang militar nga NPA infested ang maong barangay kay daghan na sila og nadawat nga impormasyon nga masigpatan kanunay ang mga rebelde sa maong dapit.

Ang heneral sa AFP-CENTCOM nga si Major General Noel Clement mimando na sa paghimo og hot pursuit operation batok sa mga rebelde aron matunhay ug magmalinawon ang mga residente sa maong dapit.

"We shall continue to address the NPA atrocities in Negros Oriental. We cannot allow terrorist groups to freely sow fear among the people and disrupt their daily lives. The full force of the law will be used against them," matud sa maong heneral.

Una nang gideklarar ni Presidente Rodrigo Duterte nga mga terorista ang grupong Communist Party of the Philippines- New People's Army-National Democratic Front (CPP-NPA-NDF).

Niadto lang Disyembre 19, 2018 sa Barangay Poblacion sa mao gihapong dakbayan gipusil patay sa nagpailang mga Special Partisan Unit (SPARU) sa NPA ang deputy chief sa Guihulngan Police station nga si Police Senior Inspector Porferio Gabuya Jr.

Si Police Regional Office-7 Director Chief Supt. Debold Sinas mibutyag   nga aduna silay nadawat nga mga pagpanghulga gikan sa mga NPA didto sa Guihulngan sa wala pa nahitabo ang pagpatay ni Gabuya. (BANAT NEWS)