Special Task Group giumol

CEBU, Philippines —  Miumol na og Special Investigation Task Group ang kapolisan alang sa pagpatay kang San Fernando Municipal Councilor Reneboy Dacalos niadtong Huwebes. Butyag sa direktor sa Cebu Provincial Police Office nga si Senior Supt. Manuel Javier Abrugena nga ang Police Regional Office-7 na ang mangulo sa imbestigasyon sa maong high profile nga kaso.

Ang hepe sa San Fernando Police Station nga si Senior Inspector Arvi Arbuis nagkanayon nga base sa mga impormasyon nga nakalap, nanagan paingon sa Dakbayan sa Sugbo ang upat ka mga mamumuno nga mipusil patay sa maong konsehal sa Barangay Poblacion sa maong lungsod.

Apan kasamtangan pa nilang gisubay ang mga CCTV sa lugar aron masuta ang mga ilhanan sa motor sa maong mga suspetsado.

Matud sa maong hepe may kalabotan gyud sa ilegal nga drugas ang numero unong motibo sa krimen nga ilang gitan-aw sanglit positibong adunay koneksyon si Konsehal Reneboy Dacalos sa self-confessed drug lord nga si Franz Sabalones.

"Tinuod man na dili man na hungihong lang," matud ni Arbuis.

Giingong kapila na nila gihangyo ang biktima nga motahan na ug moundang sa maong illegal nga negosyo apan gibalibaran sila niini.

"Kapila na namo siya gipa-surrender pero moingon ra siya nga i-consult pa niya sa iyang abogado," dugang sa maong hepe.

Si Dacalos maoy ikaduhang opisyal sa San Fernando nga nalambigit sa illegal nga drugas nga gipusil patay.

Niadtong Abril 13,2018 gipusil patay ang barangay konsehal sa Barangay San Isidro sa maong lungsod nga si Neil Abella. Si Abella giingong bagman ni Sabalones.

Gipatay kini samtang nagmaneho sa iyang sakyanan pagawas sa parking lot sa usa ka burgeran sa may Mango Avenue, Dakbayan sa Sugbo.  IBM (BANATNEWS)