Napasar nga resulosyon sa Provincial Board
CEBU, Philippines – Mokabat og 1,568 ka resolusyon ang napasar sa Hunta Probinsyal sa tuig 2018 basi sa natala sa Records Section sa Kapitolyo.
Ang maong datos naglakip gikan sa bulan sa Enero ngadto sa Disyembre sa miaging tuig.
Adunay 18 ka sakop ang PB diin gilangkupan kini sa tag-duha ka board members gikan sa pito ka distrito sa Lalawigan sa Sugbo, bise gobernador, ug tulo ka ex-officio members gikan sa PCL, Sangguniang Kabataan (SK) ug Association of Barangay Captains (ABC).
Labing daghang napasar nga resolusyon mao si provincial board (PB) Member Earl Tidy Oyas nga moabot og 176. Siya usa ka ex-officio member isip presidente sa Philippine Councilor’s League (PCL) sa Sugbo.
Si PB Member Tata Corrominas-Toribio nga nag-una sa tuig 2017 human makapasar og 219, sa miaging tuig, 61 ka resolusyon lang ang iyang napasar hinungdan nga nabutang siya sa ika-13 nga pwesto.
Ika-duha nga labing daghang napasar mao si PB Member Christopher ‘Dong’ Baricuatro sa ika-pitong distrito. Aduna siyay 168 ka resolusyon nga gi-author ug co-author sa milabayng tuig.
Misunod kang Baricuatro si PB Member Raul Bacaltos sa unang distrito nga mipasar og 144 ka resolusyon. Mas ubos kini kaysa sa 218 ka resolusyon nga iyang napasar niadtong tuig 2017.
Labing ubos sa ihap sa napasar nga resulosyon mao si PB Member Jerico Rubio nga nakatala lamang og 17 ka resolusyon. Misulod siya sa Hunta Probinsyal niadtong Hulyo isip representante sa SK.
Si Bise Gobernador Agnes Magpale mipasar og 47 ka resolusyon; Jerome Librando - 119, Jude Thaddeus Sybico - 25, Yolanda Daan - 114, Edsel Galeos - 94, Tata Salvador - 105, Alex Binghay - 78, Horacio Franco - 46, Sun Shimura - 76, Miguel Magpale - 80, Glenn Bercede - 47, Thadeo Jovito Ouano - 168, ug ABC President Celestino Martinez - 88. (/DILT)(BANAT NEWS)
- Latest
