Kapin 11 mil ka electoral board gikinahanglan

CEBU, Philippines – Gumikan sa kapin sa tres milyones ka mga narehistrong botante sa Sugbo, ang Commission on Elections (COMELEC) mibutyag nga nanginahanglan sila og kapin onse mil ka sakop sa electoral board (EB) atol unya sa May 2019 nga piniliay.

Sigon ni Provincial Election Supervisor Jerome Brilliantes, isumitir sa mga election officers sa matag lungsod ug dakbayan ang ilang lista sa mga EB karong Enero 31.

Ug susihon kon aduna pa bay mga lugar nga magkulang og EB nga moserbisyo.

“By the end of January na i-pass. Di pa na matawag nga final kay on the election day pa man gyud na ma-finalize,” matud niya.

Gipasabot usab niya nga lapas onse mil ang gikinahanglan sa tibuok lalawigan kay aduna may tulo ka EB nga magbantay sa kada presinto. Sa tulo, kinahanglan nga adunay chairman, poll clerk ug third member nga i-designate.

Ang usa ka clustered precint adunay usa ka libo nga botante nga serbisyohan. Usa kini sa rason nganong gilugwayan sa COMELEC ang voting hours og dugang nga upat ka oras matud sa tigpamaba sa COMELEC central office, James Jimenez.

Magsugod na ang pagbotar sa alas sais sa buntag ngadto sa alas sais sa gabii. Kon ikumpara sa miaging mga eleksyon, magsugod ang pagbotar og alas 7 sa buntag ngadto sa alas 3 sa hapon.

Sa tibuok Sugbo, lakip na ang mga siyudad sa Cebu ug Lapu-Lapu, adunay 3,716 ka clustered precints nga gipahimutang sa 1,182 ka mga tunghaan sa lalawigan.

Gipahibawo ni Brilliantes nga prayoridad nilang kuhaon isip EB mao ang mga public school teachers. Apan dili na kini mandatory ngadto sa mga magtutudlo human napasar ang Election Reform Act niadtong Abril 2016.

Gumikan niini, mahimo nang makaserbisyo atol sa eleksyon kadtong mga indibidwal nga kwalipikado sanglit magkuwang man unya ang COMELEC og EB.

Anaa sa balaud nga mahimong makaserbisyo ang mga private school teachers, national government employees (walay labot ang military officers), sakop sa Comelec-accredited citizens' arms ug bisan kinsa nga botante nga adunay integridad ug kamaohan ug kadtong wala malambigit sa politika.

Ang provincial election supervisor midugang nga dili dawaton isip EB kadtong mga tawo nga adunay paryenteng magpapili hangtud sa ika-upat nga degree sa lugar kun asa kini moserbisyo. (/DILT)(BANAT NEWS)