Mano-mano gihapon ang pagkuha og permit sa Talisay
CEBU, Philippines — Nagdasok ang mga aplikante sa pagkuha og mga permits sa SIyudad sa Talisay sa miaging semana diin mogahin pa gyud sila og pipila ka oras aron mahuman sa ilang transaksyon.
Nabantayan ni Konsehal Doroteo Emit nga luoy ang mga tawo kay init, langay ang proseso ug usik ang oras nga unta mas dali naman unta kini kay naaprubahan naman nila ang paggahin og pundo alang sa computerization.
Apan si Emma Macuto, city treasurer sa siyudad miingon nga mano-mano gihapon ang ilang gihimo kay wala man gyud nila napahimuslan ang computerization sa ilang buhatan.
Hinuon ilang gitawgan ang service provider aron madali ang ilang trabaho ug wala nay hasol alang ngadto sa mga aplikante.
Gibutyag ni Emit nga maayong ipangutana ni Bise Mayor Alan Bucao ang maong proyekto kay siya man ang nangunay sa pag-aprubar niini.
“Ingon sila one-stop-shop pero mao lagi na mano-mano ang ilang gihimo,” matud pa ni Emit.
Nahinumduman ni Emit nga sa miaging tuig adunay giataki ug namatay gumikan sa kainit sa palibot sa pagkuha sa mga permits.
Samtang sa iyang bahin si Bucao mipadayag nga ang konseho naninguha sa pagpa-implementar sa computerization aron mapalambo ang pagkolekta sa mga bulohisan.
“Gisugdan naman siguro. Wala lang ko kahibalo kung what particular department ang gisugdan. The city administrator can provide you more info on the matter,” asoy pa ni Bucao. (BANAT NEWS)
- Latest
