Pagbisita sa mga imahe gipangandaman

CEBU, Philippines — Gihimo na karon sa kapolisan ug kagamhanan sa Dakbayan sa Lapu-Lapu  ang gikatakdang traslacion nga himoon sa imahe ni Señor Sto. Niño karong Enero 19.

Ang traslacion  nga manukad sa Basilica Minore del Santo Nino kabahin sa kalihukan  sa pagdala sa imahe sa Balaang Bata ug Berhin sa Guadalupe paingon sa National Shrine of Saint Joseph sa Dakbayan  sa Mandaue usa ka adlaw sa dili pa ang fluvial  procession. Nunot niini ang duha ka balaang imahe gikan sa National Shrine of Saint Joseph nga luwan sa karo, adto kini dad-on sayo sa kaadlawon sa Dakbayan sa Lapu-Lapu  ug sa tiilan sa First Mactan-Mandaue Bridge habig sa Brgy. Pajo nga sugaton unya sa mga deboto nga pangulohan ni Mayor Paz Radaza.

Si Mayor Radaza miingon nga gawas sa himoong security meaures sa Lapu-Lapu City Police Office nga gipangulohan ni PSSupt. Lemuel Obon, himoon usab ang pagpahapsay  sa dagan sa mga sakyanan sa siyudad ilabi na sa luwanan unya sa mga imahe paingon sa simbahan sa Birhen sa Regla. Sa maong simbahan, adunay himoon nga santos nga misa isip paghangop sa mga imahe sa dili pa ang fluvial procession nga manukad sa Mulle Osmeña Wharf sa Brgy. Poblacion sa maong dakbayan.

Awhag ni Radaza ngadto sa mga deboto nga paglikay sa pagsul-ob og mga mahalong alahas o pagdala og dakung kantidad nga salapi sa paglikay nga mabiktima sa mga dautang elemento nga mopahimulos sa kahigayonan diin dasok ang mga tawo unya sa maong kalihukan. (/DILT)(BANATNEWS)