Cuenco balik konseho na
CEBU, Philippines – Alang sa hapsay nga transition, gitagbo ni Bise Mayor Edgardo Labella ang duha niini ka mga kauban sa Partido Barug nga mao sila si kanhi Cebu City Councilor Erik Miguel Espina ug ang mibalik nga konsehal nga si James Anthony Cuenco.
Kahinumduman nga si Cuenco gitaktak sa katungdanan niadtong Oktubre 2017 tungod sa serious dishonesty ug grave misconduct mahitungod sa kalambigitan niini sa wala matud pa paggamit og tarong sa P3.3 million nga Priority Development Assistance Fund (PDAF) allocation sa iyang amahan nga si kanhi Cebu City South District Congressman Antonio Cuenco.
Subay sa maong dismissal si Presidente Rodrigo Duterte mitudlo kang Espina isip hulip kang Cuenco.
Niadtong buwan sa Oktubre 2018, ang Court of Appeals mibali sa desisyon sa anti-graft office ug mimando sa Department of Interior and Local Government (DILG) nga si Cuenco ibalik sa pwesto.
Sugod kagahapon si Cuenco mibalik sa iyang posisyon isip sakup sa konseho sa siyudad human sa kinse ka buwan nga nawagtang sa katungdanan.
Niadtong miaging adlaw, nadawat ni Cuenco ang iyang reinstatement nga gi-served sa mga staff members sa DILG Cebu City sa balay niini sa may dalan M. Velez.
Sa pagbalik ni Cuenco, si Espina mikanaug sa iyang katungdanan ug gitubag sab niini ang pangutana labot sa iyang kandidatura sa umaabot nga May 2019 midterm elections.
Iyang gihinuklugan ang mga nagkadaiyang suhestiyon sa iyang mga kaubanan.
“Number two, some say it will weaken the team. Of course there are other studies more current that states that in fact nobody actually really vote straight”, ni Espina pa.
Si Cuenco sa iyang bahin nalipay nga siya nakabalik bisan paman og gamay nalang ang nahibilin sa iyang termino. Nagpasalamat siya kang Espina sa gihimo niini ug iyang gipasalig nga kadtong mga ordinansahon ug resolutions nga na-file, iyang tan-awon ug kon adunay angay ipadayon iyang buhaton. (/DILT)(BANAT NEWS)
- Latest
