Namusil padayong gipangita sa polis

CEBU, Philippines — Gipusil-patay ang 39-anyos nga drug surrenderer sa wala pa mailhing duha ka tawo nga nag-angkasay og motorsiklo sa may nasudnong dalan sa Brgy. Tapon sa Lungsod sa Dalaguete, alas dos sa kaadlawon, sa unang adlaw sa Bag-ong Tuig. Ang biktima giila  sa kapolisan nga si Engelbert Villanueva, usa ka drug surrenderer ug taga Brgy. Poblacion, sa maong lungsod. Sa inisyal nga imbestigasyon, nagmaneho sa iyang motorsiklo ang biktima niadtong higayona gikan sa Poblacion ug giingong gisundan sa riding- in-tandem. Pag-abot sa lugar nahitaboan, nakahigayon ang gunman ug napusilan gyud niini ang biktima nga kinsa naigo sa iyang liog. Wala pa matino kun unsa nga armas ang gigamit sa wala pa mailhing mamumuno.

Suway pa nga gidala si Villanueva sa Dr. Ildefonso Alcantara Memorial Hospital sa naasoy nga lungsod apan gideklarar kini nga dead on arrival.

“On going pa ang investigation. Wala pa sad nahibaw-an ang motibo sa krimen,” butyag ni PO3 Arnold Frenal sa Dalaguete Police Station. Padayon usab nga giila sa kapolisan kun kinsa ang mga responsable sa krimen. (/DILT)(BANATNEWS)