Pagpahiuli sa Butuanon River

CEBU, Philippines — Gitinguha karon sa kagamhanan sa Dakbayan  sa Mandaue  ang pagpahiuli sa kahimtang sa Butuanon River  dili lang sa pagpasiugda og mga pagpanglimpiyo, lakip na ang paghimo og mga pamaagi nga madani ang katawhan sa pagsuroy ug pagsud-ong sa kaanindot unya sa palibot niini.

Nunot niining maong tinguha, naglaraw ang administrasyon ni Mayor Luigi Quisumbing sa pagmugna og viewing deck nga giisip usab nga tipik ug kabahin sa mga pamaagi sa pagpaanindot sa dapit.

Daghang katigulangan ang miingon nga daku kaayo ang kausaban sa kahimtang sa Butuanon River kon itandi sa ilang panahon sa ilang kabatan-on.

Si Araceli Barlam nga maoy acting chief sa Mandaue City Environment and Natural Resources Office mitug-an nga niining panahona  adunay  62   ka mga pabrika ug uban pang establisamento ang nagbuga og hugaw paingon sa Butuanon River. Gipasabot niya nga dili man unta gyud suliran ang pagbuga og hugaw kon himoon lamang usab ang mga pamaagi nga mahimo kining limpiyo daan sa dili pa moadto sa sapa.

Si Barlam  miingon nga daghang pabrika o mga kompaniya nga nakahimo gayod  og mga kalapasan ug napakyas sa pagtuman sa  mga lagda nga gilatid sa Department of Environment and Natural Resources (DENR) ingon man pakyas usab kini pagkuha og Environmental compliance certificate gikan sa DENR Environmental Management Board.

Hinuon si  Mayor Quisumbing miingon nga iya nang gipakigkitaan ang mga tagdumala sa maong mga establisamento ug gipaniguro nila ang pagkig-alayon sa  DENR alang sa paghimo unya og tukma nga septage systems. (Romeo T. Limpangog/DILT)

Midaghan ang insidente sa sunog

Mas taas ang ihap sa mga nahitabong sunog sa nakalabay nga tuig 2018 gikan sa buwan sa Enero hangtud Agusto kon itandi kini sa milabay nga tuig sa susamang mga buwan.

Taas kini og dul-an 69 porsiyento kay miabot ang insidente sa sunog og 735 kon ikumparar sa tuig 2017 nga adunay 435 ka insidente.

Nag-una nga hinungdan sa sunog mao ang electrical connections, upos nga sigarilyo, giduslitan nga posporo, gibiyaan nga giluto ug uban pa.

Sa classification sa kayo, nag-una niini mao ang aksidente, gisundan sa sunog nga ubos pa sa imbestigasyon ug ang tinuyo nga sunog. Kadaghanan sa mga nalambigit sa sunog nag-una ang residential, grass ug rubbish, commercial ug uban pa.

Mas taas usab ang ihap sa nakalas nga miabot og 17 samtang walo lang sa milabay nga tuig. Miabot usab ngadto sa kapin usa ka bilyon ang danyos kay sa milabay nga tuig nga anaa lang sa P38 milyones.

Matud pa ni Fire Chief Inspector Fritzie Manatad, ang chief regional operations division sa Bureau of Fire Protection-7 nga mas taas ang ihap karon sa sunog kay nabalik naman sa rehiyon ang Lalawigan sa Negros Oriental.

Awhag niya sa katawhan nga kanunay magmatngon ug likayan ang mga butang nga posibleng maoy hinungdan sa sunog. (/DILT)(BANATNEWS)