Mga napatay SA 2018 misaka

CEBU, Philippines — Datos sa mga napatay nga suspek atol sa mga operasyon batok sa ilegal nga drugas sa tuig 2018 mas daghan kon ikumpara sa tuig 2017.

Sa talaan sa Police Regional Office-7 (PRO-7) sugod Enero hangtud sa Disyembre 14, 2018, gikan sa 70 nga nalista nga napatay niadtong tuig 2017, misaka kini ngadto sa 73.  Nadungagan pa kini og lima kabuok dihang napusilan patay atol sa buybust operation sa Dakbayan sa Talisay silang Rodel Nacario, Kevin Baguio ug ang managsuong Rodel ug Noel Alvarez niadtong Disyembre 18.

Samtang niadtong Disyembre 27, napatay ang usa ka Dexter Rabago sa Brgy. Jaclupan human kini giingong misukol sa mga operatiba dihang gipahigayonan og buybust operation.

Sumatotal, 78 ang napatay sa kapolisan sa miaging tuig. Diin ang 51 niini napatay atol sa buybust operation; 11 sa police patrol response; siyam ang napatay atol sa pag-implimentar og search warrant; lima atol sa pagsilbi og warrant of arrest; ug duha ang napatay sa check point. Gipasabot ni PRO-7 regional director Debold Sinas nga kon sila mamatyan og polis ug sibilyan atol sa operasyon kontra drugas maoy ilang giila nga operational failure sanglit nagpasabot lang kini nga napakyas ang gigama nila nga plano alang sa maong operasyon.

CHR naglisod og sulbad

Ang regional director sa Commission on Human Rights 7 nga si Atty. Leo Odron mipadayag nga wala sila makadawat og igong suporta sa gobyerno sanglit wala pa gyud aprubahi ang pagdugang og mga imbestigador. Iyang giangkon nga nagkatipun-og gyud ang mga kaso nga imbestigaron nunot sa pagtaas sa ihap sa mga napatay sa operasyon sa polis.

Gitug-an niini nga sa tibuok rehiyon aduna ra silay walo ka imbestigador. Hinungdan nga mao kini ang nagtukmod kanila nga mopokus na lang sa mga highly sensationalized nga kaso ug kadtong mga reklamante nga personal gyud nga modangop sa ilang opisina.

Hinuon nakasabot si Odron nga adunay higayon nga aduna usab hulga sa kinabuhi sa polis matag operasyon.

Gani iyang gikondenar ang pagkamatay sab sa pipila ka mga polis atol sa operasyon kontra drugas.

Panawagan niini ngadto sa kapolisan ug sa mga suspek nga unta magrespetohay sa ilang tawhanong katungod.

Daghang drugas sa Central Visayas

Gipanghambog sab ni Sinas ang kalampusan nila batok drugas kon ikumpara sa duha ka silingang rehiyon.

 Matud niini nga kutob niadtong Septiyembre 2018, miduso ang rehiyon siyete og 4,074 ka mga anti-drug operations samtang ang rehiyon sais anaa ray 948 ka mga operasyon ug 338 lang ang nahimo sa rehiyon otso.

Sa maong 4,074 ka mga operasyon, giingong 6,106 ka mga personalidad ang ilang nasikop ug 26 ka kilo nga shabu ang ilang nasakmit.

Wala pa kini labot sa 3.3 ka kilong shabu nga nasakmit gikan sa usa ka Jeffrey Jade Cabaron atol sa buybust operation sa Sitio Caimito, Brgy. Tisa niadtong Nobyimbre 18.

Gisundan kini sa tulo ka kilong shabu nga nasakmit gikan sa grupo sa mga durugista diin ang subject sa operasyon giila nga si Michael Carabaña sa Sitio Tambis, Brgy. Sambag II niadtong Nobyimbre 30.

Samtang silang Rodel ug Noel Alvarez nakuhaan sab og 1.2 ka kilo sa shabu.

Sa maong datos, nagpabiling nag-una ang Central Visayas kumpara sa rehiyon sais nga adunay 12 ka kilong nasakmit samtang ang rehiyon otso aduna ray usa ka kilong shabu nga nakuha.

Internal cleansing

Sa paghingusog sa kapolisan kontra drugas, nagpadayon gihapon ang ilang hugot nga internal cleansing.

Gani, sukad sa Disyembre 5, 2017 hangtud Nobyimbre 2018, adunay napulo ka pollis ang gi-dismiss sa serbisyo diin ang duha nagpositibo sa ilegal nga drugas.

Sa laing bahin, 15 ka mga polis ang gisuspenso ug 40 kabuok ang kasamtangang giimbestigahan.

Lakip sa giimbestigahan ang mga operatiba sa Carbon Police Station nga gipasakaan og reklamo sa National Bureau of Investigation human mapagan ang 4-anyos nga si Bladen Skyler Abatayo.

Lakip sa internal cleansing ang pagmontar og mga tarpaulin nga adunay mga hulagway ug pangalan sa mga aplikante pagka-polis. Kini aron makakuha sila og mga impormasyon kabahin sa maong aplikante gikan sa publiko.

Gumikan niini, adunay lima ka applicants ang gipanaktak human nakumpirmang nalambigit sila sa ilegal nga drugas. (/DILT)(BANATNEWS)