Osmeña ngadto sa Angkas: Di mo namo biyaan

CEBU, Philippines — Subling gipasaligan ni Cebu City Mayor Tomas Osmeña ang mga apektadong Angkas ug motorcycles-for-hire drivers sa siyudad nga dili sila pasagdan sa siyudad sa Sugbo karon nga gibawalan na sila sa Korte Suprema nga makapamasahero.

Kagahapong adlawa, niatubang ang mayor sa a 6,500 ka mga drivers nga mitambong sa misa ug mubong programa nga gipasiugdahan sa siyudad diha sa Cebu City Sports Complex (CCSC).

“Andam ko motabang sa inyong kawsa…We want to assure you, we will never, never abandon you,” matud ni Osmeña. Mopadala og suwat ang mayor ngadto sa Department of Agriculture(DA) aron tugutan ang siyudad nga makapalit og dili momenus 10,000 ka sakong bugas gikan sa National Food Authority(NFA) nga ihatag ngadto sa Angkas ug habal-habal drivers. Nasayran nga gidili sa balaod nga ang usa ka LGU makapalit og bugas sa NFA. “NFA is not allowed to sell to LGUs (Local Government Units). I am sending a letter to the secretary of Agriculture to consider because this is a special situation. This is not a profit, this is not a business of the city government, and it’s purely financial assistance in the plight of the drivers,” si Osmeña niingon. Apan aron di mausik ang panahon ang siyudad pinaagi sa Bids and Awards Committee (BAC) mo-schedule og public bidding alang niini.

Ang city government nitagana og P15 milyones gikan sa Philippine Amusement and Gaming Corporation(PAGCOR) funds aron ipalit sa maong bugas.

Nipagawas na usab og guidelines ang Executive Department alang sa distribusyon sa bugas sa Angkas ug habal-habal drivers. “Ang importante taga dinhi gyud ta kay kwarta ni sa siyudad.Ang ebidensya ana kung ikaw registered voter. Registered to Angkas and habalhabal drivers,” dugang sa mayor.

Mapasalamaton kini nga ang mga drivers organized na daan diin ang siyudad dili maglisod sa pag-profiling nila. Sa 6,500 ka rehistradong drayber nga namasahero gamit ang motorsiklo ang 4,000 niini mga Angkas drivers ang uban mga habal-habal drivers.  Gawas sa pagtabang sa mga apektadong drivers ug bugas, nagplano sab si Osmeña nga mopetisyon sa Korte Suprema alang sa regulation sa motorcycles-for-hire sa siyudad nga una na niyang gipahibawo.

Giklaro ni Osmeña nga nagpakabana siya sa riding public kansang transportasyon mao ang habal-habal. “Akong klarohon ang akong priority dili lang ang mga drivers, kung di ang mga taw nga wala sila’y sakyanan,” pagklaro ni Osmeña. Malaumon kini nga tukion dayon ug solusyonan sa korte ang iyang petisyon.

Si Cleofe Catrina, representante sa Angkas mitug-an nga naapektahan gyud sila sa desisyon sa Korte Suprema. Sigon pa niya pinaagi sa Angkas iyang nasuportahan ang pagtuon sa duha niya ka anak nga naa na sa kolehiyo.  “So karon akong gihangyo ang naa sa kagamhanan nga unta, please ihatag na nga ma-regulate nami, ihatag na namo kay sa tinuod lang ang among nahipos (kwarta) hurot na kay wala na mi nakabiyahe,” asoy ni Catarina. Samtang si Lyndon Obaob, representante sa habal-habal driver midason sa sentimyento ni Catarina.

“Kita naghangyo nga dili unta ta tratohon nga mura og kriminal sa kalsada. Sa mga hingtungdan sa ahensya, himoa ug tabangi kami sa among kahimtang ug hatagan og konsiderasyon kay kami  nanginabuhi lamang,” ni Obaob pa. (BANAT NEWS)