Publiko gipahimangnoang magbantay sa kawatan

CEBU, Philippines – Gipahimangnoan ang katawhan batok sa grupo sa mga dautang elemento nga mopahimulos niining panahon nga magdasok ang daghang mga tawo diha sa simbahan sa ilang pagtambong sa Misa de Gallo ug ingon man sa ilang pagsulod diha sa mga kan-anan o dagkong mall.

Si Police Senior Superintendent Lemuel  Obon, direktor sa Lapu-Lapu  City  Police Office (LLCPO) nagkanayon nga niining panahona naglakip sa ilang gibantayan ang mga pundok sa kawatan nga manimpohay.

Gibutyag ni Obon nga ang maong grupo sa mga kawatan ang nakabiktima na og usa ka Taiwanese nga babaye diha sa sulod sa usa ka kan-anan sa Barangay  Basak  sa maong  dakbayan.

Giila sa kapolisan ang biktima nga mao  si Chia Ping Liu, 23, temporaryong nagpuyo sa Chambre Hotel  nga nahimutang sa  Mactan-Cebu International Airport  (MCIA)  sa Barangay Pusok sa maong dakbayan.

Nadala sa mga kawatan ang shoulder bag sa biktima nga adunay sulod nga importanteng dokumento, power bank, P5,000 nga kwarta, visa card ug passport.

Dugang ni Obon nga lisod ang pagdakop sa maong grupo tungod kay human kini makabiktima sa usa ka dapit adto na usab kini sa laing lugar  aron adto mamiktima. — Romeo T. Limpangog/BDB (BANAT NEWS)