Universal Health Care Bill daghan og matabangan
CEBU, Philippines – Gipaabot nga daghan og matabangan ilabi na kadtong mga kabus ang Universal Health Care Bill (UHC) Bill sa Philippine Health Insurance Corporation nga nagpaabot nalang nga mapirmahan ni Presidente Rodrigo Duterte.
Ang maong balaodnon, nga na-ratify na didto sa duha ka balay balaoranan, usa ka reporma sa health sector diin mahimong integrated ang tanang serbisyon gikan preventive hangtod tertiary level of services ug mapalambo ug mapakusgan niini ang benepisyon nga mahatag sa PhilHealth.
Si Dr. Roy Ferrer, acting President and Chief Executive Officer sa PhilHealth nagkanayon nga kun sa gobyerno ug pribadong ospital magpatambal ang miyembro maka-avail sila sa gitawag nga no balance billing.
Dugang niya nga dili na kinahanglan mupagawas og kwarta ang mga pasyente nga magpakonsulta, magpa-admit, magpa-laboratory sa mga tambalanan. Apil na usab sa maong balaodnon ang mga professional fee sa mga doktor.
Hinuon, giklaro ni Ferrer nga adunay transition period nga 10 ka tuig human mapirmahan kini sa presidente. Human sa 10 ka tuig, ang UHC Bill, ma-implementar ang mga serbisyo alang sa mga katawhan.
“It will take around mga 10 years ang transition period,” suma pa ni Ferrer.
Kon maaprobahan ug effective na ang gitawag nga UHC Bill, mahimong duha nalang ang membership category sa PhilHealth, ang contributory o direct ug non-contributory o indirect. Ang contributory diha masulod ang tanang nagtrabaho, mga informal members o sectors nga mokita sama sa professional ug naay kaugalingong negosyo. Ang mga walay ikabayad maoy subsidized sa national government ug sila ang indirect contributor, buot ipasabot contributor sila apan dili sila ang nagbayad sa ilahang kaugalingon.
Adunay pamaagi sa mga dili pa miyembro sa PhilHealth, ang mag-apply o mag-register sa PhilHealth isip individual or self-employed ug pwede indigent o sponsored program members kon walay kakayanan nga mobayad sa kaugalingon. -Joevelon G. Pinay/LPM (BANAT NEWS)
- Latest
