Imee Marcos: NFA maayo pang wagtangon

CEBU, Philippines — Mas maayong wagtangon na ang National Food Authority tungod kay wala na kini makaserbisyo sa mga mag-uuma sa Pilipinas sumala pa ni Ilocos Norte Governor Imee Marcos.

Gihimong sanglitanan ni Marcos ang ka mahal sa presyo sa bugas dinhi sa Sugbo  kun itandi sa ubang lugar.

Si Marcos kinsa nidagan pagkasenador nakaobserbar niini sa iyang pagbisita sa kamerkadohan dinhi sa Sugbo.

Si Marcos kinsa nibisita kagahapon sa buhatan sa The Freeman ug Banat News nagkanayon nga nabantayan niya sa merkado dinhi sa Sugbo P43 ang presyo sa matag kilo sa bugas.

Giingong sa Vietnam, ang bugas P6 ang tubo sa presyo matag kilo ug P8 sa Thailand apan sa Pilipinas P12.50.

Gipaambit ni Marcos nga niining tuiga naagian og katalagman ang ilang lugar og mga kalamidad sama sa mga bagyo ug habagat ug nakadaot sa ilang mga tanom.

Ang lokal nga kagamhanan sa Ilocos Norte namalit og mga bugas gikan sa Traders Coop Farmers sa P25 ang matag kilo ug gibaligya nila kini og P27 matag kilo ngadto sa marginal community.

Matud ni Marcos nga mao unta kini ang angayang buhaton sa National Food Authority (NFA). Ang maong ahensiya gigahinan kini og P8 bilyones nga pundo alang sa maong katuyoan.

Apan si Marcos nagduda nga gipaburot sa NFA ang presyo sa bugas hinungdan nga bisan ang mga kabus naglisod pagpalit.

“Gusto lang ata nila ng mag-import ng mag-import, mas malaki ang kinikita sa import,” ni Marcos pa.

Sa pagkakaron aduna nay rice tarrification diin bukas na alang sa tanan ang importasyon. Kun siya maoy pabut-on, bisan   ang iyang amahan kaniadto maoy nagpatukod sa NFA angayan na kining wagtangon ug ihatag ang budget niini ngadto sa mga mag-uuma.

Mipasangil si Marcos nga wala na sunda sa NFA ang ilang charter ug wala kini nakatabang sa mga mag-uuma. Mao kini ang matud niya hinungdan nga naulahi na karon ang Pilipinas sa pagpanguma.

Kaniadto giingong ang mga mag-uumang Pilipino ang gihangop sa tanan ug gani ang mga langyaw motuyo og anhi sa Pilipinas aron magtuon kabahin sa panguma ilabi na sa pagpadaghan sa abot sa mga kahumayan ug kamaisan sa ilang nasud.

Niadtong tuig 1978 ang Pilipinas nag-export og bugas sa tibuok kalibutan apan karon ang Pilipinas nag-import na kini dili lang sa bugas, mais ug uban pang mga crops sama sa mga utanon.

Dugang ni Marcos nga kuwang sa atensiyon ug wala kaayo mahatagi sa pagtagad sa nasyonal nga kagamhanan ang habig sa agrikultura kay ayha ra kini mahinumdoman ug lingion matag mosaka ang presyo sa pagkaon. (/IBM)(BANATNEWS)