Paglapas sa tawhanong katungod nagpadayon?

CEBU, Philippines — Gikondena sa mga militanteng grupo nga gikan sa nagkalain-laing sektor ang giingong padayong pagpanglapas sa tawhanong katungod nunot kini sa pagsaulog sa ika-70 ka tuig nga kasumaran sa International Human Rights Day.

Si Dyan Gumanao, coordinator sa National Union of Students of the Philippines (NUSP) Cebu, nagkanayon nga gipahigayon ang maong protesta aron kusganong kondenahon ang nagkataas nga kaso sa human rights violation subay sa mga politikanhon ug ekonomikanhong polisiya nga giimplementar ilawom sa administrasyon ni Presidente Rodrigo Duterte. 

Si Gumanao nagkanayon nga apil na niini ang giingong padayong pag-atake, pagpatay ug pagpapriso sa mga vocal nga kritiko sa administrasyon apil na ang mga aktibista ug mga peace consultant.

Si Jaime Paglinawan, chairman sa Bagong Alyansang Makabayan (BAYAN) nagkanayon nga ilahang giawhag ang administrasyong Duterte ug ang kapolisan nga ihunong ang padayong pagpanghasi ngadto sa ordinaryong katawhan.

Giingong lakip niini ang pag-file og mga hinimo-himo nga kaso ug sa  nahitabo didto sa mga lider sa Bohol nga dunay mga trumped-up charges.

Si Paglinawan nilakbit kabahin sa pagkakonbikto ni Imelda Marcos ug nipasangil nga ang kapolisan nahadlok sa pagsikop kang Marcos aron kini prisohon.

Matud ni Paglinawan nga dili patas ang hustisya sa nasud karon.

Gisugdan ang maong rally diha sa Fuente Osmeña Circle ug nagmartsa ang grupo paingon sa Police Regional Office (PRO)-7 sa Osmeña Boulevard diin diha sa gawas sa maong buhatan sa kapolisan gipadayag nila ang ilang mga sentiment ug human niini gibato nila og kamatis ang hulagway ni Duterte isip simbolo sa ilahang kadismaya sa iyahang pamunoan.

Ug pagkahuman nagmartsa ang maong mga grupo lahos ngadto sa may dalan Colo diin didto gitapos ang maong rally. (Joevelon G. Pinay/BDB)(BANATNEWS)