Pagtrabaho sa mga dalan ipahunong una

CEBU, Philippines — Gawas sa P638 million underpass project diha sa Natalio Bacalso Avenue, ang tanang road projects sa Department of Public Works and Highways (DPWH) sa Cebu City temporaryo nga ihunong gikan sa December 16 hangtod na sa Sinulog festival.

Si Cebu City Transportation Office (CCTO) Operations Head Francisco Ouano miingon kini subay   sa moratorium sa siyudad sa tanang road works karong mga bahina sa tuig ug sa Enero.

Kini aron pagpamenus sa problema sa trapiko tungod sa okasyon sa Pasko ug sa Sinulog sa sunod tuig.

“Nagpahibawo ta sa publiko nga by December 16 naa tay moratorium, meaning to say tanang projects sa DPWH ihunong siya until mahuman ang Sinulog. At least ang mga motorista ug katawhan maka-enjoy sa December except aning underpass sa Mambaling,” asoy ni Ouano.

Sigon niini ang nagpadayon nga pagtrabaho sa underpass project sa N. Bacalso Avenue dili makaapektar sa dagan sa trapiko sa south district sa kasamtangan.

“Dili man na matabunan ang ilahang project, besides passable ang both sides,” dugang ni Ouano.

Si DPWH-7 Engineer Roy dela Cruz miingon nga gamay lang ang road projects nga giimplementar sa siyudad.

Gani sukad niadtong Nobiyembre 20 ang on-going rehabilitation sa road structure sa J. Luna Street gipahunong gumikan sa katrapik.

Si dela Cruz nga maoy project engineer sa underpass project miasoy nga maayong kalambuan nga wala giapil ang underpass project sa moratorium sa siyudad tungod kay mosamot kini og kadugay og human.

Sa buwan sa Marso sunod tuig planong mahuman ang underpass project sanglit ang proyekto 85 porsyento na nga kompleto. (/IBM)(BANATNEWS)