2019 annual budget sa Mandaue gipamolitika?

CEBU, Philippines — Gipaniguro ni Mandaue City Vice Mayor Carlo Fortuna nga hingpit nilang maaprubahan ang giduso nga  P2.4  bilyones nga 2019 budget atol unya sa ilang ikatulo ug katapusan nga pagtuki niini sa ilang regular session sulod karong buwana.

Nunot kini sa pagtumaw sa mga kabalaka nga maapektuhan ang maong gahin alang sunod tuig tungod sa politika sanglit ang mga taga oposisyon milaslas man sa budget alang sa mga departamento.

Si Bise Mayor Fortuna miingon nga ang sagad sa gilaslasan nga giduso ni Mayor Luigi Quisumbing mao kadtong adunay kalambigitan sa social services.

Sa nasayran nga ang P2.4 bilyones ang proposed budget sa Mandaue alang sa 2019  diin mas ubos kini sa kon itandi sa tuig 2018  nga mokabat sa P2. 7 bilyones.

Ang giduso  sa Committee on Budget and Finance nga taho sa ilang ikaduhang pagtuki atol sa regular session sa miaging semana, namatikdan nga nalakip sa gilaslasan sa maong gisugyot nga gahin mao ang P10 milyones alang sa financial assistance.

Laing P10 milyones  usab ang gilaslas alang sa honorarium sa trabahante sa  kagamhanan nga ubos sa  job order.  

Ang mga mipirma sa maong  committee report  mao ang mga oposisyon nga mga konsehal nga naglakip sa chairperson nga si Konsehal Nenita Layese,  Konsehal Malcolm Sanchez, sakop  sa komitiba ug Association of Barangay Councils (ABC) Federation President Ernie Manatad, nga maoy  vice chairman sa komite.

Dugang ni Fortuna nga sagad nga gilaslasan sa gahin mao ang mahinungdanon nga serbisyo sa gobyerno diin tumong unta niini mao nga masinati sa katawhan nga anaa gyud ang gobyerno pinaagi sa pagpadangat sa nagkadaiyang serbisyo.

Nalakip sa maong gahin nga ilang gituki ang pagpausbaw og P2,000 nga cash assistance alang sa mga senior citizens aron madungagan ang ilang P6,000 nga hinabang. (/DILT)(BANATNEWS)