Abtanan sa mga libudsuroy gitukod

CEBU, Philippines — Hingpit nang buksan sa sunod buwan ang resulta sa nilabay nga International Eucharistic Congress 2016 nga gitawag og Abtanan sa Kaluoy alang sa mga batang libud suroy.

Kung mahinum-duman atol sa International Eucharistic Congress niadtong tuig 2016 nga gipahigayon dinhi sa Dakbayan sa Sugbo, usa ka nag-inusarang layko Maggie Cogtas ang nipadayag sa iyang damgo nga adunay madangpan ang mga batang libud suroy nga maisip nilang ilang panimalay.

Matud pa ni Fr. Carmelo Diola, sa Dilaab Foundation anaa na karon sa finishing touches ang “Abtanan sa Kaluoy” nga anaa nahimutang duol sa Mabolo Church  nga inugurahan karong Enero 29, 2019 subay sa ikatulo ka tuig sa IEC.

Sumala pa ni Diola, ang ground floor ug 2nd floor maoy magamit na gilayon sa mga bata alang sa activity center sa mga bata uban sa 17 ka mga serbisyo nga ilang ihatag sama sa libreng kaligo, dental, medical, pagpakaon sa mga bata ug uban pa.

Dugang pa ni Diola, mga volunteers ang modumala sa Abtanan sa Kaluoy nga motudlo usab sa mga parokya  kun unsaon pagatiman ang sa mga libud suroy sa ilang mga dapit.

Gibutyag ni Diola nga gusto nila makaeskuyla ang mga batang masulod sa Abtanan sa Kaluoy kay sagad sa mga libudsuroy nahunong na sa pagtungha kay wa nay niatiman kanila.

Si Archbishop Jose Palma sa Archdiocese of Cebu, mihangop sa maong proyekto tungod kay bunga kini sa ilang kahago sa nakalabay nga IEC2016. (BANAT NEWS)