Hepe sa TCPS mohangyo sa CentCom

CEBU, Philippines — Tinguha usab sa kapolisan sa Dakbayan sa Talisay nga adunay presensiya sa mga sundalo diha sa kadalanan sa siyudad.

Si Superintendent Marlu Conag, hepe sa Talisay City Police Station nagkanayon nga dili lang sa pagtabang sa mga traffic enforcer sa pagpatuman sa lagda sa balaod sa trapiko apan lakip na ang pagpitol  sa mga badlongon nga mohimo og modus operandi.

Matud ni Conag nga sa maong paagi dakong tabang na kini kanila aron mokunhod pa ang kriminalidad sa Dakbayan sa Talisay.

Gibutyag ni Conag nga mopadala siya og suwat ngadto sa kadagkoan sa Central Command (CentCom) alang sa iyang hangyo kalabot sa iyang plano.

Kini kon mahimo pa ba sa CentCom nga mogahin sa ilang sakop gawas sa ilang naandan nga gimbuhaton.

Sa nasayran, dakong problema sa mga enforcer sa Talisay ang mga badlongon nga mga drayber nga nakatampo sa kahuot sa trapiko sa siyudad.

Gawas niini, giingong adunay mga drayber sa traysikad nga badlongon usab ug masuko kini kong pangbadlongon. (BANAT NEWS)