Hepe sa CPADAO nihimakak sa report

CEBU, Philippines — Gihimakak sa pangulo sa Cebu Provincial Anti-Drug Abuse Office (CPADAO) nga adunay dul-an sa 50 ka barangay sa Lalawigan sa Sugbo ang matangtangan og drug-cleared status.

Kini human sa report nga adunay mga barangay nga peligrong matangtangan og drug cleared certificate tungod kay giingong wala ka mentenar.

“I want to be cleared on the report nga naay 49 kabuok barangays nga revoke-kan og declaration. I wanted to be cleared, I did not state any figure in regards to nga ma-revoke-kan”,  matud ni Carmen Remedios “Ivy” Durano –Meca, pangulo sa CPADAO.

Nipasabot si Meca nga ang tanang barangay sa Lalawigan sa Sugbo nga una na nga gideklara nga drug-cleared sa regional oversight committee gipadad-an nila og kopya ang mga mayor niini sa monitoring report nga gihimo matag tulo ka bulan.  Moabot ngadto sa 245 ka barangay sa tibuok probinsiya ang nadeklarar na nga drug cleared.

Si Meca nagkanayon nga ang sulat ngadto sa mga mayor nagsaysay nga mohimo og aksiyon sa finding sa technical working group atol sa monitoring niini ug dili pagpahibalo nga tangtangan og drug cleared certificate.

Si Meca nagkanayon nga kon dili mohimo og aksiyon ang mayor o ang mga opisyal sa findings nga nasuta gikan sa mga barangay human sa 30 ka adlaw posible gyud kining makuhaan og certificate.

Apan sa pagkakaron wala pay gitangtangan og drug cleared status ang oversight committee. (BANAT NEWS)