Duterte gipaningil atol sa Bonifacio Day
CEBU, Philippines — Gipaninglan sa mga mamumuo ang administrasyong Duterte sa mga saad niini atol gipahigayong rally sa nagkadaiyang grupo atol sa kasaulogan sa Bonifacio Day kagahapong adlawa.
Si Dennis Derige, tigpamaba sa Partido Manggagawa Cebu miingon nga nangita sila sa pasalig ni Presidente Rodrigo Duterte nga wagtangon ang contractualization.
Dugang niini nga tulo na ka tuig hangtod karon apan wala pa gihapon kini maaprobar.
Siya miingon nga unang gisaad ni Duterte ang pagwagtang sa provincial rate ug i-nationalize ang suhulan apan tulo nalang ka tuig sukad kini misaad, wala gihapon kini matuman. Matud niya nga sama og gitalikdan na sa kasamtangang administrasyon ang ilang mga yangungo.
Dugang niini nga mas maayo pa ang 29 ka kontrata tali sa China kay dali kaayong napirmahan apan ang gisang-at nila nga Security of Tenure Bill, tulo na ka tuig nga nag-ung-ong og wala pa gyud matagad. Nunot niini, mensahe ni Derige sa mga magpapili sa sunod tuig nga midterm election nga unta unahon sa ilang plataporma ang problema sa pamuo.
Subay niini adunay gipahigayong programa ang kagamhanan sa Siyudad sa Sugbo paghandum sa ika-155 nga birth anniversary ni Gat Andres Bonifacio.
Ang kalihukan gipahigayon sa Plaza Independencia sayo sa buntag kagahapon nga gitambungan nila ni Cebu City Mayor Tomas Osmeña, Cebu City North District Representative Raul del Mar, mga konsehal, mga nagkalain-laing grupo ug kawani sa city hall.
Gihandum ni Mayor Osmeña atol sa iyang pakigpulong ang mga nahimo ni Bonifacio alang sa nasud.
“There are many things that we should learn from our history but let’s pay tribute at this moment to Andres Bonifacio and people like him. Because of people like Andres Bonifacio that we are now in fact a united country for 7,000 islands, let us not forget what it took him to make that decision he was not an educated person he was very poor but he stood up for something”, asoy ni Mayor Osmeña.
Human mamulong, mihalad og buwak ang mayor ngadto sa estatuwa sa bayani uban ang iyang kapikas nga si Konsehal Margarita Osmeña ug ang mga konsehal sa siyudad ug si Kongresista del Mar.
Si Bonifacio natawo niadtong Nobyimbre 30, 1863 sa Tondo, Manila ug namatay kini niadtong Mayo 10, 1897. Gitawag siya nga “The Great Plebeian”. (Joevelon G. Pinay /DILT)(BANATNEWS)
- Latest
