Unit 3 sa Carbon nasunog

CEBU, Philippines – Gituohang kuryente ang hinungdan sa pag-ulbo sa sunog nga mikaon sa ikaduhang andana sa Unit 3 Carbon Public Market sa Dakbayan sa Sugbo kagahapon sa hapon.

Sigun pa ni Cebu City Fire Marshall Chief Inspector Noel Nelson Ababon base sa inisyal nga imbestigasyon mibuto ang linya sa kuryente sa gawas sa maong edipisyo.

Nadawat ang maong alarma sa sunog pag alas 3:16 sa kahaponon kagahapon ug  miabot sa ikatulong alarma. Paglabay sa kapin usa ka oras nga kombate nakontrolar kini sa mga bombero.

Si Felix Rupinta, usa sa mga manindahay sa dapit miasoy nga dali ra nga mikatap ang kalayo sa ilang lugar.  Siya nagduda niini nga ‘jumper’  ang mibuto sanglit daghang mga illegal jumper cables sa lugar.

Samtang ang   Administrative Aide I sa City Market nga si Unique Enoc,  miasoy nga diha siya sa iyang opisina dihang miulbo ang kalayo pagkahuman sa nadunggan nilang lanog nga buto.

Ang iyang opisina nahimutang sa tungang bahin sa maong building ug naapil kini og kasunog.

“Nanyagit ug nanagan ra gyud mi diretso. Akong cellphone nabilin gud. Lisud kaayo run kay renewal sa contract of lease aning mga naninda diri. Ang mga dokumento didto nasunog na og apil,” sigun ni Enoc. sa Banat News. Ang maong sunog nagbilin og danyos nga gibanabanang moabot P1 milyon ug nakaingon sa taas kaayong brownout sa pipila ka mga dapit sa downtown area hangtud pasado alas-7 sa gabii na kini nabalik. (Camille Pateres/IBM)

“Death Squad” ni Duterte gitun-an sa AFP

Si Armed Forces Chief of Staff General Carlito Galvez Jr. mitug-an nga gitun-an nila ang sugyot ni Presidente Rodrigo Duterte nga magmugna og kaugalingong Special Partisan Unit (Sparu) nga maoy mogukod sa Sparu Unit usab sa mga rebeldeng komunista. Gitawag sa mga kritiko ang maong grupo nga ‘Duterte Death Squad (DDS)’.

Kagahapon, nangulo si Galvez sa selebrasyon sa ika 17 nga founding anniversary sa Armed Forces of the Philippines- Central Command.

Sa interbyu sa mga tigbalita, wala siyay supak niini  apan sa iyang pagsabot gusto sa presidente nga pangusgan ang operasyon batok sa mga rebelde.

“Yung sinasabi ni president is also a good warning on us na paano natin ma-encounter both the part of the security and actual neutralization of those who are perpetrating Sparu operations of the enemy, ” si Galvez miingon.

Sa pagkakaron gipakusgan nila ang intelligence units sa militar batok sa maong mga rebelde.

Matud niya upat ka batalyon ang gipadala ngadto sa mga probinsya sa Samar, Leyte ug Negros Occidental lakip na ang pipila ka lugar sa Negros Oriental tungod sa presensya sa Sparu units didto. Gihimakak sab ni Galvez nga sinugdanan na sa martial law sa tibuok nasud ang memorandum order 32. (/IBM)(BANAT NEWS)