Mga mananagat nireklamo sa pasangil

CEBU, Philippines – Ang kagrupo sa mananagat nga napusilan patay niadtong Domingo diha sa marine sanctuary sa Barangay Atop-atop Isla sa Bantayan nipasangil nga deretso lang sila nga girakrakan sa mga polis.

Ilang gihimakak ang pasangil nga giingong nisukol sila sa mga polis dihang gibadlong sila ug matud usab nila nga wala silay mga dalang armas.

Ang manag-agaw nga Ronnie Batiancila, 41 ug Ronnie Batiancila, 36, (pareho og pangalan ug apilyedo) taga Hilantagaan, Santa Fe lakip sa 10 nga gipasanginlang nanagat diha sa marine sanctuary  giubanan sa ilang kagawad nga si Cruz Bragat, 49, nga nidangop diha sa estasyonan sa  DYHP kagahapon.

Sa interview sa maong estasyonan gihimakak nila ang pasangil nga nisukol sila sa mga polis ug giingong wala usab sila managat sa mismong fish sanctuary tungod kay niadtong higayona 300 metros ang gilay-on gikan sa sanctuary.

Nasayran nga niadtong Domingo, napusilan patay si Arnel Derder Marabi, 33, residente sa Barangay Hilantagaan human giingong nakigpinusilay sa kapolisan sa  Bantayan Police Station gamit ang usa ka sumpak o improvised nga armas.

Nadakpan ang kaubang boatman niini nga si Michael Dela Cruz Dignos, 38, lumulupyo usab sa Hilantagaan samtang nakaikyas ang giingong walo pa ka mananagat.

Base sa report sa Bantayan Police Station nanagat diha sa marine sanctuary ang maong grupo ug gibadlong kini sa mga polis.

Si Marabi kinsa nakaangkon og samad pinusilan sa iyang buko-buko natagak sa dagat ug gisawom ni Dignos.

Ang grupo nangayo og tabang nga mahatagan og hustisya ang kamatayon sa ilang kauban.

Samtang ang direktor sa Cebu Provincial Police Office (CPPO) Police Senior Superintendent Manuel Javier Abrugena atol sa press conference kagahapon nagkanayon nga magpahigayon sila og internal investigation kabahin sa maong taho.

Dugang ni Abrugena nga adunay mga natala nga insidente nga giingong mosukol ang mga mananagat kong badlongon kini sa otoridad. -/BDB (BANAT NEWS)