Deboto sa Birhen sa Regla naghugpong

CEBU, Philippines – Bisan pa sa hulga sa bagyong Samuel liboan ka debotos sa Birhen sa Regla ang naghugpong kagahapon sa buntag atol sa Misa Pontipika nga gisaulog ni Archbishop Jose Palma.

Si Palma nipadayag nga bisan sa hulga sa bagyong Samuel malipayon siya tungod kay nagpadayon gihapon ang tanang kalihukan sa pista lakip na ang Santos nga Misa.

Matud ni Palma nga ang pagpadayon sa maong kalihukan sa pista nagpakita sa paghimaya sa Dios ug ni Mama Mary diin nagpakita kini sa gugma nga wala maapektahi bisan bagyo, uwan o init nagtigom gihapon ang katawhan.

Nunot niini, si Palma nagkanayon usab nga subay sa nagsingabot nga ika-500 ka tuig sa Kristyanismo sa nasud diin gasa kini sa pagtuo nga nagpakita nga buhi ang pagtuo maayo usab nga ipaambit sa katawhan ang ilang mga talento ug mga kahibalo ilabi na ngadto sa labing nanginahanglan.

Malipayon usab si Palma nga samtang nagkaduol ang 2021 daghan gihapon sa katawhan ang nagtukod og mga adoration chapel ug padayon ang pagtambong sa katawhan sa mga Santos nga Misa ug pagpalambo sa ilang mga pagrosaryo ug nobena.

Si Padre Bernard Corpuz, kura paruko sa simbahan sa Birhen sa Regla mapasalamaton sa bagang duot sa mga magtutuo diin bisan sa dili maayong lakat sa panahon malampuson gihapon ang kapistahan sa Birhen sa Regla.

Gibana-bana ni Corpuz nga moabot ngadto sa 10 mil ka tawo ang nitambong sa maong Misa Pontipika diin daghan karong tuiga ang nitambong kompara sa nilabay nga tuig. -/BDB (BANAT NEWS)