Film making contest atol sa Sinulog
CEBU, Philippines – Alang sa sunod tuig nga Sinulog Festival, giawhag sa Sinulog Foundation Inc. (SFI) ang mga local film makers nga moapil sa film making contest aron mapakita ang ilang talento sa mga Sugbuanon.
Si Konsehal Dave Tumulak, Sinulog executive committee chairman, niingon nga gusto nila i-promote ang talento sa local film makers pinaagi sa pag-presentar sa ilang mga films sa mga turista ug mga Sugbuanon.
Sigun niini, ang finalists sa short film making contest mahatagan og prebilihiyo nga i-presentar ang ilang masterpiece human sa festival nga ipahigayon matag ikatulong Domingo sa buwan sa Enero sa Dakbayan sa Sugbo.
“So sa 2019 pinakalahi nga Sinulog Video Festival nga himoon sa Siyudad sa Sugbo kay ato man hatagan og pasidungog ang mga batan-on ug katong mga tiguwang nga movie makers,” sigun ni Tumulak.
Matud sa konsehal nga ang film making contest bukas sa local producers basta ang ilang ginama nahaum lang sa festivity ug spiritual concept sa Sinulog.
Giawhag ni Tumulak ang mga film makers nga sa paggama nila sa ilang salida dili wagtangon ang bisaya nga pamaagi sa film making.
“Gi-encourage nato ang local movie makers nga to expand their creativity without pagwagtang sa bisaya nga pamaagi sa film making,” dugang sa konsehal.
Pilion sa mga judges ang tulo nga labing nindot nga salida diin ang mga mananaug makadawat og ganti nga P100,000 sa champion, P50,000 sa second prize ug P30,000 sa third prize.
Gawas niini, dunay poster making contest, disc labeling contest ug Sinulog documentary contest sa Sinulog Festival.
Pareho ra og premyo ang film making contest ug ang documentary contest diin ang premyo sa ubang contest tukion una sa SFI aron ma-finalize kun pila ang ganti ug adto kini kuhaon sa panudlanan sa SFI.
Gilauman nga sunod buwan ang mga film makers ug artist mosumetir sa ilang entries sa SFI.
Gipasabot ni Tumulak nga niumol sila sa maong nagkalain-laing kompetisyon aron pagpakita sa talento sa mga native artists nga magdala og pasidungog sa mga Sugbuanon. -/GMR (BANAT NEWS)
- Latest
