Loot nilarga sa US
CEBU, Philippines – Usa ka buwan nga magbakasyon si Daanbantayan Mayor Vicente Loot human kini nakaduso og leave of absence sa buhatan ni Gobernador Hilario Davide III.
Si Loot sa iyang suwat ngadto kang Davide nananghid nga siya molarga sa United States of America aron bisitahon ang iyang nasakit nga igsuon.
"The said travel is very important as I need to visit my sickly and aging sisters, attend to the birthday celebration of my sister in Maryland and at the same time spent my vacation thereof," matud sa suwat ni Loot nga pinetsahan og Nobiyembre 5, 2018.
Nagsugod og leave si Loot niadtong Nobiyembre 18, 2018 human kini giaprobahan sa gobernador duha ka semana ang nilabay.
"I will be away for the said period. Nevertheless, please be assured that my absence will not impair the delivery of services under herein office," matud ni Loot.
Si Loot una na kining gikataho nga nagtago human wala na motungha sa iyang buhatan niadtong Agosto.
Gitataw hinoon sa pamilya sa mayor nga anaa ra gihapon si Loot apan naglikay lang sa pagpakita sa publiko tungod sa kabalaka sa seguridad human siya gilambigit ni Presidente Rodrigo Duterte sa ilegal nga drugas.
Si Loot ug iyang pamilya nakalingkawas sa suway nga pagbanhig niadtong Mayo samtang kuyog ang tibuok niyang pamilya.
Si Davide nagkanayon nga wala siyay problema sa pag-leave ni Loot sanglit nipasalig man kini nga dili mabiyaan ang serbisyo sa Lungsod sa Daanbantayan.
Gani si Bise Mayor Gilbert Arrabis Jr. ang nangulo sa pagpangandam sa bagyong Samuel isip acting mayor.
Masaligon si Davide nga mobalik ra si Loot sa iyang trabaho human sa iyang leave.
Ang provincial director sa Department of Interior and Local Government (DILG) nga si Jerome Gonzales niingon nga dili na sab kinahanglan pa nga mananghid ang mayor sa ilang buhatan sanglit personal man ang lakaw niini ug dili opisyal nga kinahanglan mogasto ang gobiyerno.
"If personal in nature ang travel, iyang gasto tanan. Ang approve nga leave of absences is enough authority to travel," matud ni Gonzales. -/GMR (BANAT NEWS)
- Latest
