Skate park sa siyudad mahinayon na gyud

CEBU, Philippines — Gitugotan karon sa Konseho sa Dakbayan sa Sugbo si Mayor Tomas Osmeña nga makapirma og Memorandum of Agreement (MOA) ngadto sa iyahang igsuon nga si Victoria Osmeña kalabot sa pagtukod og skate park facility sa likod sa Fort San Pedro nga nahimutangsa Pigafetta Street niining dakbayan.

Niadtong Martes, atol sa regular session, ang konseho niaprubar resolusyon ni Konsehal Eugenio Gabuya Jr. chairperson sa committee on games, amusement, and sports mahitungod niini.

Nagkaideya ang siyudad sa pagtukod sa maong pasilidad alang sa mga skateboarder enthusiasts human nakadawat ang mayor og requests sa mga kabatan-onan.

Nakadugang niini si Margielyn Didal nga lumulupyo sa Barangay Lahug kinsa nakakuha og gold medal atol sa gipahigayon nga ASIAN Games niadtong buwan sa Augusto.

Si Victoria migahin og P5 milyones alang sa skate park apan ang siyudad kinahanglang maoy motagana og luna nga katukoran niini.

Matud pa ni Gabuya sa Banat News nga ang MOA signing mahitabo karong Disyembre 5, 2018. Human sa MOA signing, aduna’y ground breaking ceremony nga pagahimoon. (BANAT NEWS)