Tukorong international seaport sa San Fernando malangay pa gyud
CEBU, Philippines — Giuli sa Department of Environment and Natural Resources ang application alang sa area clearance sa reclamation component sa giplano nga international seaport sa Sangat, San Fernando.
Matud ni DENR-7 Director Gilbert Gonzales nga wala natuman sa port developer nga si Ruben Feliciano ang mga rekomendasyon sa Land Management Bureau.
Sayo niini si DENR Undersecretary for Filed Operations, Atty. Juan Miguel T. Cuna, niluwat og memorandum sa pagsuspenso una sa application ni Feliciano hangtud makompleto ang mga rekomendasyon.
Kini naglakip sa environmental compliance certificate (ECC) gikan sa Environmental Management Bureau subay sa DENR Manual of Authorities on Technical Matters sanglit ang proyekto usa ka major reclamation project.
Kinahanglan sab ang evaluation ug pagtugot sa Biodiversity Management Bureau sanglit ang proyekto anaa daplin sa dagat diin adunay mga bakhaw nga tanum.
Sulbaron una Executive Order No. 5 sa mayor sa San Fernando sa pagpahunong sa bisan unsa nga proyekto sama sa reclamation projects sa baybayon sa Barangay Sangat nunot sa reklamo sa mga mananagat.
Gikinahanglan sab ang partnership sa Local Government Unit o sa Philippine Reclamation Authority sa pagpatuman sa proyekto subay sa Rules and Regulations Governing the Issuance of Permit Over Reclamation Projects and Special Patents Over Reclaimed Lands.
Si Feliciano nagtinguha sa pag-ugmad og multi-million international port sa Barangay Sangat, San Fernando apan gipugngan ni Mayor Lakambini Reluya tungod sa giingong kakuwangan sa mga papeles ug mga dokumento. (BANAT NEWS)
- Latest
