Pabor-pabor sa merkado sa tabunok

CEBU, Philippines — Nagpabilin ang giingong pabor-pabor nga pagkuha og pwesto sa bag-ong merkado sa Tabunok sa Siyudad sa Talisay.

Kini human si Konsehal Doroteo Emit atol sa deliberasyon sa budget sa 2019 sa siyudad nipadayag sa suliran sa 16 ka manindahay sa merkado bahin sa giingong pabor-pabor. Matud ni Emit nga iyang gitambagan ang mga reklamante nga moduso sa ilang reklamo aron iyang ipaabot sa konseho ang ilang yangungo.

Base sa reklamo nga dunay manindahay nga makakuha gihapon og lamesa o pwesto sa merkado nga tagtulo ngadto sa lima.

Gani ang uban niini gipaabangan pa imbis nga mahatag ngadto sa ubang manindahay.

Ang maong hiwi nga sistema nabantayan na kini sa mga opisyal sa City Hall sa dihang wala pa giayo ang merkado ug gani aduna may gihimo nga team nga maoy mosusi niini.

Apan niining bag-o hayan imbistigahan sa konseho ang maong reklamo inig abot sa pormal nga sumbong sa mga reklamante.

Gihangop sab ni Winnie Bas, administrador sa merkado, ang maong imbestigasyon aron masuta kun kini tinuod ba o dili. (BANAT NEWS)