Motor sa jail officer gigamit sa mga tulisan

CEBU, Philippines – Duha ka tulisan sa may Tipoloville, Barangay Kalunasan, Dakbayan sa Sugbo ang nasikop atol sa gipahigayon nga checkpoint niadtong Miyerkules sa hapon.

Ang mga nasikop naila nga sila si Lonie Viene Ledesma, 34, walay trabaho, taga Barangay Suba, ug John Kenneth Pungcol, 18, taga Barangay Sawang Calero, Dakbayan sa Sugbo.

Samtang ang biktima mao si Jean Sy, 31-anyos, kawani sa banko ug temporaryo nga nagpuyo sa usa ka hotel sa may Andres Abellana Street, Barangay Guadalupe, Dakbayan sa Sugbo ug lumad nga taga Sampaloc, Manila.

Mga sakop sa Guadalupe Police Station nga pinangulohan ni Police Senior Inspector Dexter Basirgo ang nipahigayon ug checkpoint sa lugar dihang nakadawat kini og tawag gikan sa desk officer nga adunay tulis sa may Andres Abellana ug ang suspek padulong  sa Barangay Kalunasan hinungdan sa pagkasikop sa mga tulisan.

Nasakmit gikan sa mga dinakpan ang Samsung S6 balor og P60 mil, .38 revolver ug tulo ka bala, motor ug mga pinutos nga ginadili nga drugas nga mobalor og P46 mil. Human nasikop ang mga suspek, nasuta nga motor sa jail officer sa Cebu City Jail ang gigamit nila sa pagpanulis.

Ang mga suspek giila nga maoy nikawat sa motor ni Jail Officer 2 Lawrence Diaz Abella, 41, sa Mountain View, Kalunasan.

Ang mga dinakpan nagtingkagol na sa selda kapolisan ug gipaabot ang pagpasaka og tukma nga kaso. Samtang top 6 most wanted person sa Minglanilla Police Station ang nasikop sa kapolisan sa Poblacion, Argao niadtong Huwebes sa hapon.

Ang nasikop mao si Dave Plarisan, 25-anyos, taga Barangay Poblacion Ward 4, Minglanilla.

Usa ka joint operation ang gipahigayon sa Argao Police Station pinangulohan ni Police Chief Inspector Jose Rovic Villarin ug Tracker Team sa Minglanilla Police Station nga gipangulohan ni Police Chief Inspector Verniño Noserale sa pag-implementar sa warrant of arrest nga giluwatan ni Judge Veronico Sardoncillo sa Municipal Trial Court sa Minglanilla niadtong Hulyo 5, 2018.

Ang korte nipahamtang og P36 mil nga piyansa alang sa temporaryo nga kagawasan sa suspek kinsa kasamtangan karon nga nagtingkagol sa selda sa kapolisan. (Clydyl L. Avila/GMR)(BANAT NEWS)