BPO free shuttle dunay adjustment

CEBU, Philippines — Malampuson ang unang dry run sa free shuttle service alang sa mga business process outsourcing (BPO) gikan sa Juan Luna Avenue paingon sa I.T Park ug vice versa.

Niadtong Lunes sa gabii nagsugod ang dry run diin matud sa pangulo sa Cebu City Call Center City, Nanette Garong, nga daghan ang nisakay sa 30-seater nga coaster nga gitagana sa siyudad.

Ang unang biyahe alas 9 sa gabii apan nasuta nga dunay mga call center agents nga mosulod sab sa ilang trabaho sa maong oras.

Kini ang hinungdan nga duna sila’y adjustment nga gihimo diin ang first trip magsugod sa alas 8:30 sa gabii, sundan  sa alas 9:30 dayon alas 10:30, 11:30 sa gabii, sundan sa 12:30 sa kaadlawon, 1:30, 2:30, 3:30 ug 4:30 sa kaadlawon.

“Actually kaning gihimo nato nga dry run karon di ba testing lang na siya, testing lang na siya kung unsay dagan sa atuang rota, unsay gidaghanon sa volume, yes ga expect nata ana so later maybe a private bus will do it for them kay to the BPO employees, it doesn’t matter kung moplite sila as long as safe sila and then di sila ma-late pero importante gyud nila ang ilang security and safety so maybe a private bus company will take over but at least karon nasuwayan na nato ang rota og padagan,” asoy ni Garong.

Gawas sa free shuttle service, dunay Ce-Bus o Kaohsiung bus nga i-deploy ang siyudad nga mopasakay lang gihapon sa mga call center agents.

Ang designated pick-up area anha sa J.M Del Mar Avenue/Geonzon Street Bus Stop.

Ang unang rota gikan sa pick-up area paingon sa JY Square lahos sa area sa Capitol Site padulong sa Fuente Osmeña paingon sa Harrison Park, padulong sa Abellana National School dayon Metro Colon ug vice versa.

Ikaduhang rota gikan sa pick-up area padulong sa corner F. Cabahug Street paingon sa Mabolo Church lahos sa dalan Hipodromo paingon sa T. Padilla dayon Osmeña Boulevard padulong sa Metro Colon ug vice versa.

Sigun sa pangulo sa Department of General Services (DGS), Ronald Malacora, nga alas 12:30 kagahapon sa kaadlawon diha nay mga pasahero nga nisakay sa mga bus nga mobiyahe sa uptown ug downtown areas.

Walay nasugatan nga kakulian sa pagpatuman niini sanglit nakig-alayon man sab sila sa management sa I.T. Park aron sab maka-park sa sulod ang upat ka bus sa siyudad.

Gitataw ni Malacora nga bisan dili mga trabahante sa BPO pwedeng makasakay sa bus basta naa lang sila sa bus stop apan prayoridad gyud ang mga BPO workers.

“Prioritize ang BPO kay adto man pud maggikan ang bus sulod sa I.T. Park. If ever mapuno niya wala nay lugar so dili na gyud sila kasakay pero kung pwede pa sila ma-accommodate pwede ra gyud na sila makasakay,” dugang ni Malacora. -/GMR (BANATNEWS)